Prokurador general Guus Schram – potrèt di archivo: Dick Drayer
PHILIPSBURG – Parlamento di Sint Maarten unánimamente a aseptá un moshon ku ta pidi prokurador general Guus Schram pa tuma su retiro. Dia 11 di yüli, na instalashon di wes Sander van Rijen, Schram a bisa ku “tin sufisiente indikashon di relashonnan struktural entre baho mundu i e komunidat legítimo na Sint Maarten.”
Pa esaki Schram a referí na e rapòrtnan di integridat ku for di aña pasá a sali tokante Sint Maarten. Pero e rapòrtnan aki ta bisa ta nèt kontrali, esta ku no a haña niun prueba pa e relashonnan aki.
E moshon severamente ta kondená Schram su palabranan. E teksto ta pidi gobièrnu – ku pa kasualidat djis despues nan a manda kas – pa tuma pasonan pa realisá ku Sint Maarten ta haña un prokurador general ku ta biba i traha einan mes.
Schram no ker a reakshoná riba e pregunta si bou di e sirkunstanshanan aki ainda ta posibel pa e keda hasi su trabou na Sint Maarten. “No ta na Ministerio Públiko (OM) pa reakshoná riba e moshon aki”, el a laga sa via bosero Norman Serphos.
Schram i huntu kuné OM di tur banda a haña krítika de parlamento. “E palabranan aki ta inaseptabel”, lider di frakshon di National Alliance Wlliam Marlin ta haña. “Ta falta di OM si no pèrsigui krímen.” Marlin a referí tambe na e sentenarnan di denunsio di e Meldpunt Ongebruikelijke transacties (MOT) di kua niun di nan OM no a investigá.
Retiro
Minister di Hustisia Dennis Richardson ta bisa ku Schram su retiro ta posibel solamente si e ministernan di Hustisia di Kòrsou i Hulanda koperá. “E manera ku e prokurador general tin e sosten di e minister hulandes, ami por bul’ariba kai abou, pero nan no ta dun’é su retiro.
Outor Hilbert Haar