Foto: Ariën Rasmijn
ORANJESTAD — Traficacion y benta ilegal di gasolin y diesel for di Venezuela a bira un negoshi grandi na Aruba. Falta di legislacion y capacidad pa controla ta haci cu personanan por sigui trafica combustibel y bende esaki – hopi biaha for di nan cura – sin wordo persigui judicialmente.
Pa ambos polis maritimo y Directie Scheepvaart di Aruba e ta un situacion preocupante, a pesar cu recientemente Venezuela a cuminsa cera su fronteranan pa para e traficacion.
Tin alrededor di dies barconan di placer cu di cual a modifica e tankinan di gasolin y cu cada siman ta sali diferente biaha pa lugarnan manera Puerto Escondido na Estado Falcon ba busca gasolin of diesel of ta topa otro barconan for di Venezuela riba laman na unda ta pasa combustibel. Gasolin y diesel na Venezuela ta hopi mas barata cu na Aruba danki na subsidionan di e pais riba combustibel.
E practica aki riba su mes no ta ilegal segun Carlyle de Coteau, director di Directie Scheepvaart. “Tempo mi tabata biba na Hulanda nos tabata core bay Belgica tambe pa cumpra gasolin barata.” Na regreso na Aruba ta djis subi e boto riba tera, hibe cas anto saca e combustibel pa warde den bari den cura. Otro biaha ta declara e combustibel na aduana, a pesar cu e no a wordo ‘uitgeklaard’ na Venezuela. Tambe tin barconan di placer cu ta bin cu tanki yen for di Venezuela y ta bende combustibel akinan.
Ta trata di un volumen di miles di liter pa cada boto y un margen di ganashi asina grandi cu segun De Coteau traficadornan di droga a cambia di negoshi y a cuminsa trafica gasolin y diesel. Recientemente gobierno di Venezuela a anuncia cu nan lo para e fluho ilegal di combustibel for di nan pais. Hecho ta cu banda di barconan di placer for di Aruba tambe tin embarcacionnan mas grandi cu for di frontera di awanan teritorial di Aruba y Venezuela ta trafica cantidadnan grandi di combustibel pa otro paisnan den region. No ta conoci si ya caba por nota cu e traficacion a bira menos awo.
Siguridad
Segun De Coteau y tambe agente Igmar Benschop di polis maritimo, loke por controla riba dje mas tanto ta aspectonan di siguridad. Bisiñanan di e traficadornan ta core riesgo cu barinan di gasolin volatil den cura. De Coteau ta bisa cu Directie Scheepvaart ta purba dificulta e traficacion dor di forsa traficantenan di aplica di nobo pa drenta awanan teritorial di Aruba unabes cu nan sali. E control cu nan por haci riba tankinan di boto ta keda limita mientras cu e ley maritimo nobo no ta na vigor ainda. Cu e ley aki nan lo por haci control tambe durante e periodo cu un permiso pa navega ta vigente.
Aduana tin e autoridad pa controla riba e cantidad di gasolin cu un barco ta sali y ta bin bek cune pa asina enforsa riba fraude di accijns. Minister Arthur Dowers di Husticia den un reaccion na Red Caribense tambe ta mustra riba responsabilidad di aduana. Segun Igmar Benschop sinembargo, aduana te ainda falta e capacidad y manpower pa por haci esaki efectivamente. E ta bisa cu instancia concerni mester traha hunto pa por combati e fenomeno.
Autor Ariën Rasmijn