Ret Karibense ta trese un seri di artíkulo tokante e islanan di Hulanda karibense, sinku aña despues di e renobashon estatal di 10 di òktober 2010. Riba e fecha ei a desmantelá Antia Hulandes i Sint Maarten i Kòrsou a bira pais outónomo den reino. For di e dia ei Boneiru, Sint Eustatius i Saba ta ‘munisipio ekstraordinario’ di Hulanda. Aruba tin e státùs outónomo for di 1986 i no tabata forma parti mas di Antia Hulandes.
Edison Rijna – potrèt: Janita Monna
KRALENDIJK – “Bonerianunan bini bèk, futuro di boso isla ta yama boso”, Tio Rolly a kanta riba Dia di Boneiru. Hennyson Thielman, Davis i Merry Piar i Edison Rijna, un hende di binti aña, dos di trinta i un di kuarenta a kumpli ku e petishon aki kaba. Nan a nase na Boneiru, nan a studia na Hulanda i nan a bai bèk despues di 10.10.10.
“Rincon no a kambia hopi”, Merry Piar ta bisa, “pero Boneiru mes a bira hopi mas okupá.”Edison Rijna: “Ántes mi por a tene Boneiru den mi man, mi tabata sa presis di ken kua outo tabata. E tempu ei a pasa.”
Hende di famia
Merry i Davis Piar for di zomer di 2011 ta biba den e kas kaminda Merry a lanta. Ku nan tres yu hòmbernan nan a muda bèk for di Breda. Promé nan ker a keda Hulanda 5 aña. Ma nan a keda 11 aña. Nan tur dos tabata sa ku nan lo a bai bèk: “Mi tata tabata malu”, Merry ku ta asistente di dòkter ta bisa. “Mi ker a kuid’é. Nos ta hende di famia.
Edison Rijna tambe tabata sa dia el a bai studia na Hulanda ‘ku despues di mi estudio mi ker a kontribuí na mi isla’. El a biba hopi tempu na Kòrsou. For di einan el a lanta un kompania na Boneiru pa resiklá sushi i den zomer di 2014 el a bai biba bèk einan tambe: komo gezaghebber. HennysonThielman despues di su estudionan na Aruba i Hulanda , ta bèk atrobe for di 2013. Mi mester a bini bèk Mi stima Boneiru.”
Karera
Pa Davis Piar mudamentu bèk tabata un paso atras den su karera. “Mi tabatin un bon trabou na un banko. Mi mester a kustumá di traha na Boneiru. Na final mi mester a skohe: keda kunsumí pa e manera ku kosnan tabata bai of bai ku e tempu. Mi a skohe pa e último.” Esei a pone ku e tabata sobra tempu pa otro kos, manera trein hubentut di Rincon pa hunga futbòl. “Asina mi por nifiká mas pa mi famia i pa e isla.”
Thielman a bini bèk pa ‘trese kambio’ . E no ta mira su mes komo un ‘career person’, pero e ta ta e organisadó nobo di Bonaire Regatta i konsehero di diputado Abraham si. E tabata riba lista di kandidato pa MPB tambe.
Plannan
Tin be Davis Piar ta tende ku ‘el a biba muchu largu na Hulanda’. “Espesialmente ora mi ke planeá muchu hopi kos.”Un falta den pensamentu delantá i struktura segun e ta pone ku Boneiru no ta kla ainda pa un kontinuashon di outonomia. “Rijna: Por ta ku un dia lo ta posibel, pero pa bira Kuerpo Públiko e tempu ei probablemente tabata e mihó opshon. Tòg ni Boneiru ni Hulanda no tabata sa ta den kiko nan a hinka nan mes riba 10 di òktober 2010. Tin kos ku a bai muchu lihé. Introdukshon di dòler a hasi pobresa visibel.”
10-10-10 a trese diskushon sosial severo, Piar a sigui nan riba social media: “Hende hopi bia ta papia a base di sintimentu. Ami ta preferá wak sifra. Kisas tin mas hulandes ta bini, tin di nan ta bai atrobe despues di tres aña. Na mi trabou tambe ta tuma hopi hende for di den regio.” E frikshon segun Rijna ta bini entre otro pasobra e bonerianonan ta haña e manera direkto di e hulandesnan fèrfelu i e hulandesnan hopi bia no ta mira kon kosnan ta bai aki. “Poko poko nos ta topa otro.”
Thielman ta realístiko: “Mundu ta bai dilanti, ke men nos tambe. Mi no gusta keha i despues no hasi nada. Mi ke organisá evento pa hóben, pasobra pa nan te ainda no tin masha kos di hasi.”
Merry i Davis Piar ta keda Boneiru, meskos ku Thielman, ku a mira hopi di su amigunan bieu di havo tambe bini bèk. “Esei ta bon pa Boneiru. Nan konosé e kultura, pero nan tin un bista amplio riba mundu tambe.”
Krusada
Segun Rijna e isla ta na un krusada pa sigui desaroyá ekonómikamente: “Tin posibilidat pa empresario, Hulanda ta krea trabou, espesialmente pa amtenar, RCN, prizòn, polis. Lo ta bunita si e amtenarnan di mas haltu den futuro tambe ta bonerianu.”
Outor Janita Monna