Potrèt: Anneke Polak
WILLEMSTAD – Un soño di hopi tempu a sali riba 10 di òktober 2010. Kòrsou a bira pais outónomo den reino. E alegria di fiesta a kambia masha lihé. “Nos a haña nos fòrsá di realisá ku for di e dia ei nos mester a hasi tur kos nos mes.”
Ainda Kòrsou no a bira adulto sinku aña despues di 10-10-10, Elmer Wilsoe, èks gezaghebber i despues di 10-10-10 minister di Hustisia i awor miembro d Staten pa e partido di independensia Pueblo Soberano, ta bisa. “Niun ora so. E preparashonnan pa 10-10-10 tabata abominabel. Pura pura pasobra mester a alkansá e fecha mágiko, djosa pakiko. Ke men ora e yu a nase e no tabata kla. Un desilushon pa pueblo ku nan a primintí un pais di ko’i bon bida so.”
E problemanan aki di den komienso, e promé minister plenipotensiario di Kòrsou Sheldry Osepa tambe a eksperienshá, kende djis promé ku el a sali pa Den Haag tabata diputado di asuntunan konstitushonal. “Tur hende mester a kustumá ku e komienso. Un pais nobo ku mandatario nobo, pero ku kustumber bieu. Bintisinku porshento di e amtenarnan tabatin opheshon kontra nan funshon nobo.
Tenshonnan
Na Den Haag Osepa a eksperienshá ménos problema. “Tabatin un aktitut habrí, ministernan tabata mustra mi kaminda den polítika di Den Haag. Mi mester atmití ku algun polítiko ta bèrdaderamente interesá, nan konosé nos paisnan bon.” Mientra ku Osepa tabata traha riba e lasonan ku Hulanda, e kos a bai malu riba nivel mas haltu. “Den un aña tabatin tenshonnan haltu entre Kòrsou i Hulanda.”
Rina tereno finansiero na yüli di 2012 Kòrsou a haña un instrukshon di Konseho di Minister di Reino. Den un aña e défisit a subi di sero pa ochenta mion florin i e aña despues tabatin e menasa di un défisit di 160 mion. Mester a intervení, e miembro di Cft pa Kòrsou Alberto Romero ta bisa. “Mi no a ferwagt ku e kos lo a bai atras asina lihé pasobra na Kòrsou un sanashon kompletu a tuma lugá. Ku e instrukshon a disidi e límite. Tin be mester sondia, ta meskos ku un mucha ku ta wak kon leu e por bai.”
Reformashonnan
For di 2013 tur aña a sera presupuesto ku un surplus, a subi edat di aov pa 65 aña i a ehekutá reformashonnan den e sistema di penshun. Esaki ta un alivio pa Alex Rosaria, ántes sekretario di estado di Finansa i awor miembro di Staten pa partido di koalishon PAIS. “No tabatin konfiansa mas den ekonomia i pueblo ku sodó di nan frenta a kontribui pa hasi e situashon sano atrobe.
Kòrsou mester hasi tur kos e mes for di 10-10-10, i esei ta bon, Osepa ta bisa. “Nos no por tira e falta di nos fayonan riba e otro islanan mas.” “Bo ta ripará si ku polítika a bira mas duru”, Wilsoe ta bisa “Ántes e profundidat tabata mas grandi. Esei no ke men ku no tabatin debate pisá den Eilandsraad, pero hende tabata respetá otro su opinion. E kòntrastnan a bira mas skèrpi.”
Integridat
Osepa: “Ta klaro ku nos polítikonan no a yega e nivel ainda kaminda parlamento berdaderamente por hisa un moketa kontra gobièrnu.”E renobashonnan estatal di 10-10-10 pa Rosaria tampoko no a hasi nada den e área ei. “Nos por keda kambia i inventá struktura, pero si nos no hasi nada na e kalidat i integridat di e polítikonan nos no ta bai dilanti.”
Outor Anneke Polak