Raymond Begina (man robes) i Harm Brouwers | Potrèt: Dick Drayer
WILLEMSTAD – E Komishon di Evaluashon di Leinan Hudisial di Reino no a elaborá e legitimidat sosial i polítiko di e Leinan di Reino di konsenso. Tòg el a tuma su tarea mas amplio ku a formul’é pasobra el a papia no solamente ku stakeholder sino ku organisashonnan sosialmente relevante tambe.
A presentá e resultado di e evaluashon djaweps meinta den ouditorio di Universidat di Kòrsou. Konklushon di mas importante: sigui ku e ehekutashon i implementashon di e Leinan di Reino.
Lei di Reino di Polis
E kuater Leinan di Reino ta trata di e Korte Komun di Hustisia, Ministerio Públiko (OM), Polis i Konseho pa Mantenshon di Derecho. Nan a establesé na 2010 ora Antia a stòp di eksistí i e paisnan nobo Kòrsou i Sint Maarten i e ‘kuerponan públiko’ Boneiru, Sint Eustatius i Saba a forma. E palabrashon tabata pa evaluá nan despues di 5 aña. E punto sentral tabata e funshonamentu di e leinan den práktika.
For di e rapòrt a sali ku mayoria di e Leinan di Reino (ku eksepshon di e Lei di Reino di Polis) kasi a implementá kompletamente.Tòg a presentá un kantidat grandi di punto di atenshon i binti rekomendashon, ku den deliberashon ku e diferente parlamentonan mester kondusí na tumamentu di desishon durante e Deliberashon Hudisial di Kuater Pais na desèmber. Tin prekupashon pa e seguridat finansiero di Korte Komun i Polis.
“Pero no a ehekutá un parti di por ehèmpel e Lei di Reino di Polis tampoko pasobra tabata falta e deseo polítiko”, Harm Brouwers, miembro di e presidio di e Komishon di Evaluashon ta bisa. “Asina e koperashon entre e paisnan via e Previshon Komun di Polis no a kuminsá kana.”
Idioma i Kultura
E komishon den su rapòrt ta pidi atenshon spesial pa e posishon di idioma hulandes den mantenshon di órden. Tur legislashon ta na hulandes. Pero hulandes no ta e idioma mas papiá bou di pueblo. E komishon ta rekomendá pa investigá unda den mantenshon di òrden uso di idioma hulandes no ta estriktamente nesesario. Asina e siudadanonan di e islanan envolví lo por duna mas komprenshon di nan propio sistema hudisial.
Derecho di kanselashon
E komishon no ta duna un opinion tokante e derecho di kanselashon di e Leinan di Reino. Ta palabrá e pregunta si den e rapòrt. Tur dos argumentu tin nan balor, pero e komishon ta haña ku pa konsed’é ta algu pa término largu. Mientrastantu ku no a kumpli ku e implementashon kompleto, tin otro prioridat. E Leinan di Reino no ta “grabá den piedra” i mester trata di un perspektivo di desaroyo estatal permanente. Riba término mester por revisá e Leinan di Reino.
Outor Dick Drayer