Angela Roe ku e imágen di Boeli van Leeuwen | Potrèt: Dick Drayer
WILLEMSTAD – Antropólogo Angela Roe djasabra a gana e prestigioso premio Boeli van Leeuwen 2015. El a haña e premio pa su sine Sombra di Koló, ku ta denunsiá e tabu riba koló i rasa na Kòrsou. Kada dos aña riba Boeli van Leeuwen su fecha di nasementu gobièrnu di Kòrsou ta entregá e premio.
E premio ta konsistí di 10 mil florin, un sertifikado di apresio i un eskultura chikí di bròns, traha pa e eskultor hulandes internashonalmente famoso Cornelis Zitman ku ta biba na Caracas.
A presentá e di kuater edishon na Hotel Avila, kaminda Boeli van Leeuwen te na su morto na 2007 tabatin su lugá fast di sinta. E tabata bin bebe kòfi ku amigu i konosí i tabata diskutí tópikonan literario, kultural, polítiko i estatal.
E hurado a elogiá Roe i su sineastan Selwyn de Windt i Hester Jonkhout pa e sine pasobra e ta kibra tabu i a lanta un debate amplio tokante koló i rasa. “Kompletamente segun e ideanan di Boeli van Leeuwen, ku tabata resistí maneranan di hasi imponé komo herensia di un komunidat kolonial segmentá.”
“Ku e premio aki e tópiko di koló i rasismo ta haña rekonosementu”, Roe ta bisa. “Ta un tema ku nos mester hasi algu kuné i si gobièrnu duna atenshon na esaki, e ta haña un balor nobo: sali for di e área di tabú. Hulanda i Kòrsou tin miedu di papia di rasa i esaki awor ta kambiando poko poko. E premio pa mi ta un empuhe pa mi, pa mi sigui.”
Outor Dick Drayer