Proyekto di infrastruktura na Wechi a yega su fase final – potrèt: José Manuel Dias
WILLEMSTAD – No opstante ku e trabounan di infrastruktura na Wechi a keda konkluí, Fundashon Kas Popular (FKP) no por kuminsá konstruí kas riba e tereno aki. Pa evitá posibel kaso den korte minister Suzy Camelia-Römer di Planifikashon Urbano a opta pa no emití ningun pèrmit di konstrukshon i a start ku un ròndu di konsulta ku tur aktor envolví.
Segun Lloyd Narain di Amigu di Tera i Defensa Ambiental te ku aworakí e kòmbersashonnan ku minister Camelia Römer no a produsí ningun resultado konkreto i a palabrá ku lo bini un di dos reunion. Durante e promé enkuentro a papia entre otro riba e aspektonan hurídiko, e eksigensianan i tambe e konsepto di bibienda popular.
Un reportahe di José Manuel Dias
Aktualmente tin mas di shete mil persona riba e lista di espera di Fundashon Kas Popular wardando riba un kas pagabel. Hopi di nan ta stèns riba e proyekto di bibienda sosial di Wechi kaminda FKP tin planiá pa konstruí un total di kuater mil kas. “FKP mester primi un tiki mas riba gobièrnu pa nos por haña un kas”, un siudadano ku ta riba e lista largu di espera a vosiferá.
Kla pa bai korte
E opheshonnan kontra di e desaroyo di Wechi ta hopi i kualke eror ku gobièrnu kometé lo ta motibu sufisiente pa organisashonnan ambiental bolbe kuminsá un kaso den korte. “Nos abogado ta kla pa entamá un kaso”, asina Lloyd Narain di Amigu di Tera a duna di konosé den kaso ku gobièrnu disidí tòg di otorgá pèrmit di konstrukshon pa Wechi.
Demanda di shen mion
Komo si fuera ku e menasa di e organisashonnan ambiental no ta basta, a bini un menasa èkstra riba e desaroyo di Wechi. Ta trata aki di un demanda di shen mion florin di Norwin Ferrero ku ta alegá ku e ta un di e herederonan di e tereno riba kual FKP ke bai traha kuater mil kas. Segun Ferrero kaminda FKP ke konstruí kas no ta Wechi sino Malpais anto Malpais ta propiedat di herederonan di e katibunan liberá di Rasveld di kual “ami ta un di e herederonan”. Ferrero ta basa su mes riba e mapa di J. Werbata di 1910 for di kual e ta dedusí ku Wechi en realidat ta Klein Malpais.
Entretantu Ferrero a dirigí un karta na Minister Camelia-Römer den kual e ta pidi pa stòp ku e konstrukshonnan na Wechi pero te awe e no a haña un kontesta di parti di e mandatario.
Segun planifikashon di e kontratista Aliansa Civil & Roadworks e proyekto di infrastruktura di Wechi, ku ta totalmente finansiá pa gobièrnu di Kòrsou, mester a keda entregá na DOW den luna di mei último. Sinembargo pa motibu di sierto trabounan ku a bini aserka e proyekto a sufri un atraso i ta keda konkluí e luna aki.
Awor ku e kamindanan, roinan i sistema di riolering ta kla ta toka turno na e kompanianan di utilidat manera Aqualectra i UTS pa pone nan sistema di infrastruktura konforme e plan di parselashon.
Outor José Manuel Dias