Internat di mucha Brakapoti for di aña 1952 ta akohé mucha ku no tin un base bon na kas – potrèt: Elisa Koek
WILLEMSTAD – Sinku mucha hòmber di Internat pa mucha Brakapoti a hasi denunsio di abusu seksual kontra dos guiadó di e internat. Tres di e mucha hòmbernan ta mas hóben ku diessinku aña, e dos otronan tin diesocho aña òf mas bieu.
Asina visepresidente Monte Horsford di Internat pa mucha Brakapoti ta konfirmá. Ounke e investigashon ta kore ainda, a kita un guiadó for di trabou kaba. Na mart di e aña aki e promé denunsionan a drenta kontra guiadó Mayron Maduro, kende ku su fundashon Un Bon Hóben tabata koperá ku e internat.
“Ministerio Públiko (OM) e ora ei a kuminsá un investigashon, pero nos no a warda esaki i nos a kit’é fordi trabou mésora”, e visepresidente di e internat ta bisa.
Karta urgente
A skòrs e otro guiadó, K. Vrutaal, ku alabes ta shafùr di e internat medio sèptèmber, despues ku e organisashon kordinadó Aliansa ku un karta urgente a pidi atenshon pa e asuntu. “Mésora nos a tah’é di subi e tereno i a skòrs e wardando e investigashon. Mi ta haña ku ta skandaloso si ku nos komo instituto no por a haña mira niun denunsio por eskrito”, Horsford ta bisa.
E karta urgente di Aliansa – ku riba 8 di sèptèmber a manda pa OM, polis, minister di Hustisia Nelson Navarro i minister di Desaroyo Sosial Ruthmilda Larmonie –Cecilia, ta trabou di kuater fundashon: Bos di Hubentut, Nos T’ei pa PaOtro, Dedima i Muhé Uniformá, Arma (MUA). “Ta duel Aliansa masha di tende ku e kaso di Maduro ta konosi for di aña 2010 serka polis i Hustisia – a denunsiá echonan kastigabel – sin ku polis i OM a hasi un investigashon di e kasonan aki”, asina tin pará den e karta.
Bosero di OM Norman Serphos ta laga sa ku tin dos investigashon ta kore despues di e denunsionan na Internat pa mucha Brakapoti. E no por bisa kuantu denunsio tin. “Tur dos e investigashonnan ta kore ainda. Nunka nos no ta duna informason tokante abusu seksual serka persona menor di edat.”
‘Seguridat no ta garantisá’
Aliansa ke pa tene e investigashonnan mas lihé posibel pa asina por tuma paso na e internat pa garantisá seguridat di e hóbennan. “Komo ku te awe e investigashonnan no a kuminsá esaki tin konsekuensha físiko i emoshonal masha pisá pa e víktima en kestion i pa e posibel otro víktimanan di Internat di mucha Brakapoti”, asina Aliansa ta skibi.
E fundashonnan ta referí na un denunsio di 7 di mei e aña aki di un hóben tokante abusu seksual ku dos guiadó a kometé. “Ku esaki e seguridat i derechonan di mucha menor di edat den Internat di mucha Brakapoti no ta garantisá.”
‘Problema di internatnan’
Horsford ta laga sa ku e hóbennan ta haña guia pa nan por partisipá normalmente ku e otro muchanan. “Nos ta èkstra alerto i serka kada insidente sospechoso guiadónan mésora mester hasi denunsio.” Tòg e visepresidente ta bisa ku e no a spanta di e denunsionan. “Mi tin basta tempu kaba den e mundu di akohida di mucha, esaki ta un problema ku regularmente internatnan sa haña nan kuné. Pesei mester keda vigilá kontínuamente.”
Outor Anneke Polak