Asiento den Tweede Kamer – potrèt: Risastia
DEN HAAG – Den parlamento franses e teritorionan di ultramar tin representashon direkto. Di e 577 parlamentarionan a elegí 23 pa duna e teritorionan aki un voto. E presidentenan di e Bestuurscollegenan di Hulanda Karibense no tin masha interes.
Clark Abraham, diputado di Boneiru, ta sképtiko. E ta preferá di trese polítika di Den Haag pa Boneiru en bes di visevèrsa. “Ta kiko lo ta e balor èkstra? No ta un solushon si un di e miembronan di Tweede Kamer grita algu na nòmber di e islanan, miéntras ku tin nuebe miembro di konseho insular ku ta atende interesnan di Boneiru. Ami ta bisa bòltu e kos. Ora tin lei ku ta toka e isla – si e konseho haña nesesario – ta trese nan dilanti de konseho insular. Politics are local.”
Bon lòbiista
Reginald Zaandam, diputado di Sint Eustatius, no ta di akuerdo ku Abraham ku awor e leinan no ta pasa Eilandsraad. “Esei nos tin kaba. Pa loke ta e kantidat lo no hasi muchu diferensha, pero bo tin un aporte direkto si. Sigur si bo pone un bon lòbiista einan, lo ta masha bon.
Kambia konstitushon
Zaandam ta kalkulá ku e chèns no ta grandi ku lo bini un asiento pa BES òf un asiento pa kada isla. “Lo mi keda kontentu si e islanan lo por a representá nan mes den Tweede Kamenr. Pero mi no ta mira esaki sosodé e dies, diessinku añanan binidero. Bo mester kambia Konstitushon, esei ta tuma dos temporada di gabinete.”
Diputado Chris Johnson (Saba), ku siman pasá a proponé pa lanta un konseho di BES, no ta mira mashá den e modelo franses. “E konseho di BES manera mi ta mir’é, tin outoridat berdadero i esei ta traha mas mihó. Ademas, kon un polítiko so por representá tres isla ku diferente zonido polítiko?”
Diferenshanan
Johnson ta bisa ku e islanan ta diferente di otro, por ehèmpel den kantidat di hende. “Kiko ta e chèns ku un sabano un dia por okupá e asiento ei? Den práktika semper lo ta un bonerianu. Ku esaki nos ta bai bèk na e práktikanan di Antia.” Ku e último aki e ta referí na e posishon klave di Kòrsou den tempunan ayá.
Por último e sabano ta duda si un asiento BES por trese e partinan di Reino mas serka di otro. “Mi ta kere ku un parlamentario asina lo haña un stigma enorme, ku e otro parlamentarionan lo bisa algu manera: atá, bèrdè, BES. Bai puntra na e banda franses di Sint Maarten si nan ta haña ku e kos ta traha bon. Mi ta kere ku nò. I mi no sa si bèrdaderamente nan ta sinti nan parti di Fransha.”
Outor Pieter Hofmann