Kartanan di e bentana di pèrmit tokante ekspirashon di e deadline di petishon di LOB – potrèt: Leoni Leidel-Schenk
WILLEMSTAD – Landsverordening Openbaarheid van Bestuur (LOB) teorétikamente ta regla e derecho riba informashon di gobièrnu pa tur siudadano.
Pasobra informashon di gobièrnu semper ta públiko, a ménos ku LOB of un otro legislashon disidí ku e informashon ku a pidi no ta adekuá pa publiká. Ret Karibense a disidí di tèst esaki i a entregá diferente petishon di LOB.
Garantia
Na e bentana kaminda por entregá petishon di LOB e trahadó ta bisa ku nan ta manda un petishon dos be pa e ministerio konserní ku un deadline di tres siman. Si despues di seis siman no haña reakshon, nan no por hasi nada mas. Ora puntra si regularmente ta honra petishon di LOB e kontesta ta: “mayoria parti nos no ta tende nada, nos no por duna niun garantia.”
Di nos kuater petishonnan di LOB despues di kuater luna a kontestá un: Nos ker a sa si a duna pèrmit pa konstruí kas na Wechi. Esaki ta e kaso pa un pida tereno chikí pa ocho bibienda na Malpais. Ta keda sin kontestá e pregunta si a duna pèrmit pa e sobra pida terenonan riba e tereno enorme di Wechi.
E petishonnan pa mira e pèrmit di konstrukshon i instalashon di Kruithuis na Brievengat, e pèrmit di molèster di e bùnkernan di Curaçao Oil Terminal na Bullenbaai òf pa mira e kuentanan anual di Stichting Studiefinanciering Curaçao (SSC) ta keda sin haña kontesta. Kartanan di e bentana di pèrmit tokante pasamentu di e deadlinenan ta yega nèchi na ora. Den kada delaster karta tin para ku ‘lastimamente ministerio no a risibí e informashon ku a pidi’. Anto aparentemente asina a kita e kos fo’i man.
Outo-investigashon
Den e Landsverordening tin pará ku e minister di Asuntunan General kada aña, prome ku 1 di yüli, mester raportá tokante LOB na Staten. Si pidi e raportahenan di Staten aki di último sinku aña e kontesta ta ku for di aña 2002, tempu ku Miguel Pourier tabata promé minister ainda, no a raportá na Staten tokante LOB. A aseptá e Landsverordening bou di Pourier na aña 1995. Riba e pregunta si Staten komo órgano kontroladó no mester insistí riba esaki tur aña, no ta bini kontesta. Anto esaki miéntras ku segun e Landsverordening e ‘evaluashon di e funshonamentu di e publisidat di gobièrnu komo forma di outo-investigashon di e órgano di gobièrnu ta importante’.
Eline van den Broek-Altenburg, ku komo reportero na aña 2010 a trata di haña dokumentonan di finansamentu di partido polítiko, no por a haña nada. “Mi a traha un aña i mei pa haña e informashon ku mi a pidi. Mi ker a sa kuantu di e finansamentu di partidonan polítiko tabata públiko, pero via e bentana di pèrmit no tabata bini niun kontesta. E ora ei mi a bai puntra na Ministerio di Finansa mes. Na fnal mi a bai defensor di pueblo di e tempu ei Alba Martijn, ku mester a intermediá entre ami i ministerio. E minister di Finansa di e tempu ei, George Jamaloodin di MFK a bisa literalmente ku e tin e informashon pero ku e no ker a duna mi pasobra mi ta periodista. Anto nota bon ku ta komo siudadano mi a pidié!” Asta ku intermediashon di Defensor di Pueblo e no a yega mas leu. “Mi no tabatin e idea ku tabata trata di informashon sekreto sino simpelmente di informashon ku no t’ei.”
Si un órgano di gobièrnu no reakshoná riba un petishon di LOB por bai wes mésora. Korte ta disidí si gobièrnu mester kontestá e petishon i komo demandante bo por pidi un multa di mil florin pa dia ku un máksimo di 100 mil florin, si e organo di gobièrnu no kumpli ku e petishon di LOB denter di tres siman.
Hurídiko
Ke men tin medida si, pero hopi bia siudadano i periodista no ta tuma e paso ei. “Naturalmente mi a kontemplá di tuma paso hurídiko, pero mi no tabatin un organisashon mi tras ku ker a karga e gastunan”, Eline ta bisa. Tòg ta manera situashonnan malu na LOB ta haña mas atenshon awendia; e organisashon di naturalesa Carmabi poko tempu ei a bai wes pasobra gobièrnu no ker a duna akseso na e dokumentonan tokante e kambio di destinashon di Oostpunt. Wes a disidí ku gobièrnu mester duna akseso promé ku kuater siman pasa sino nan mester paga e but di 1000 florin pa dia.
Outor Leoni Leidel-Schenk