Un bentaha di screening ta ku por kompará kòntròlnan anterior ku kòntròl nobo – potrèt: Elisa Koek
WILLEMSTAD – “Mi mes no a pensa pa screen riba kanser di pechu. M’a pensa ku mi lo ripará si algu no tabata bon.” Lugá Anne van Lierop tabatin kanser di pechu. El a haña un yamada di fundashon prevenshon pa bin screen i afortunadamente e kanser tabata den un fase trempan.
Fundashon Prevenshon for di 2010 ta tene screening di kanser di pechu. Nan a kaba di terminá e investigashon di kanser di garganta di matris. Ounke prevenshon di e dos enfermedatnan aki ta solamente e kuminsamentu, di repente ta parse manera e fundashon su fin a yega serka. Gobièrnu no ta duna e plaka nesesario pa kontinuá.
Fundashon Prevenshon a start na 2010 ku ayudo di donatùr privá i seguronan médiko. E fundashon ku e fondonan aki lo a finansá e promé sinku añanan i despues gobièrnu lo a tuma e fundashon ofer. Na febrüari Fundashon Prevenshon a haña un karta ku mester palabrá tokante e traspaso, pero te awe no a tende nada mas. “Gobièrnu a primintí 600 mil, i nos ta masha kontentu ku esaki. Pero mester di 1.9 mion pa por laga e fundashon kontinuá”, direktor Louise Elstak ta bisa.
Ekonomisá riba kuido
Segun E Kòmpas Nashonal di ministerio di Salubridat Públiko hulandes, prevenshon tin komo meta pa evitá enfermedat i komplikashon di enfermedat òf detektá nan den un stadio mas trempan posibel. Ku e punto di bista aki a lanta Fundashon Prevenshon: promé ku screening di kanser di pechu, pa despues ekspandé. “Paisnan ku ta hasi prevenshon ta spar plaka di kuido”, Elstak ta sigui. “Ku un diagnosis trempan bo ta evitá ku hende ta bira malu òf muri mes.”
Angeline de Ron tabatin kanser di pechu. E tampoko no ker a sa di nada. Te dia ku el a sinti un pipita den su pechu. “Mi a profundisá i m’a ripará kon dushi ta pa haña tep i interkambiá eksperiensha.” De Ron a lanta Fundashon Sinta Ros, un fundashon pa pashènt di kanser di pechu pa sostené otro. E ta enfatisá e papel di Fundashon Prevenshon pa su fundashon. Nos ta hasi e parti sosial, nan ta hasi e kòntròlnan. E koperashon ta perfekto.”
Bo no ta un number
Un bentaha di screening ta ku ora kompará kòntròlnan anterior ku esunnan nobo, por ehèmpel ta ripará kambio den e tehido di e pechu mas lihé. Segun De Ron ta bai mas leu ainda. E ta konta kon importante ta pa e barera pa un eksaminashon ta abou. “Ainda tin muchu tiki konosementu tokante kanser di pechu, ke men e barera no mester ta muchu haltu. Tur dia mi tin hende muhé ku kanser di pechu rònt di mi i mi sa kon importante ta ku bo no ta un number. Na Prevenshon nan ta komprondé esaki.”
Ekspandé
E di dos paso di Fundashon Prevenshon tabata kanser di garganta di matris. E fundashon a kaba di terminá un investigashon i kolektá data pa duna un konseho pa henter Área karibense. Despues lo mester ekspandé e prevenshon pa evitá por ehempel enfermedatnan króniko òf diabetis. Pa ekspandé ku prevenshon di otro enfermedat, anualmente mester bini nèt un tiki mas plaka. “Bon mirá nos a kaba di kuminsá i ta pesei lo ta masha lástima si nos mester stòp”, Elstak ta bisa. “Tur aparato, screeningnan ku tin den nos sistema, e koperashonnan ku Kranshi i spesialistanan: tur esaki lo bai pèrdi.”
Gobièrnu no a anunsiá ofishalmente ainda ku e fundashon lo no risibí e suma total pa 2016. Elstak ta spera ku den e lunanan binidero nan bini ku e plaka tòg.
Outor Elisa Koek