John van ‘t Hoff – potrèt: Janita Monna
KRALENDIJK – E ta satisfecho ku e veredikto di wes? John van ‘t Hoff mester pensa. Despues e ta bisa: “Nunka no ta satisfaktorio ku un doño di trabou por djis saka bo afó. Ma mi ta aliviá ku e kos aki ta tras di lomba i ku mi por mira padilanti atrobe.”
Te ku yüni di 2014 Van ‘t Hoff tabata direktor general di Scholengemeenschap Bonaire. Despues di seis aña di servisio e direktiva di skol a sak’é for di su funshon.
Deliberá
E mes luna ei Van ’t Hoff a entamá un kaso sumario, e ker a bai traha bek atrobe den e funshon ku e tabatin. Wes a husga ku e partidonan mes mester a mira kon huntu nan ta sali aki ‘fo. Anneke van Toll, abogado di Van ‘t Hoff: “Ora nos a sali korte nos a pensa: nos ta bai deliberá mésora ku e skol. Pero e abogado solamente a bisa ‘boso ta tende di nos’i djei a keda ketu.”
Kuater dia despues di e kaso sumario tabata kla kaba ku Van ‘t Hoff lo no bolbe bèk den e funshon di direktor general di SGB: e dia ei e direktiva a presentá Lydia Emerencia komo direktor interino nobo.
Spekulashon
Van ‘t Hoff no ke komentá riba e spekulashonnan ku posibelmente masha tempu kaba tabatin plannan pa nombra Emerencia na su lugá. “Esei no ta kita ku pa mi te dia djawe no ta kla pakiko mi mester a bai.” E petishon pa anulashon di e kòntrakt, ku direktiva di SGB a pidi na yanüari di e aña aki, tambe wes a rechasá, pasobra no tabatin prueba ku Van ‘t Hoff lo a funshoná malu.
Na final Van ‘t Hoff mes a pidi pa anulá. SGB a bai di akuerdo, pasobra segun e skol por a reprochá e èks direktor hopi kos: e lo a benefisia su mes, e lo a kometé faboritismo, e lo a kousa problema finansiero, i e lo no tabata basta enérgiko. Pero segun Van ‘t Hoff niun di e echonan aki nunka no a sali dilanti anteriormente, i e akusashonnan ta ‘kompletamente un fantasia’.
Rason
Wes a duna e èks direktor di SGB rason djárason. E ta konsiderá ku no a prueba niun di e akusashonnan. Segun wisio di e wes e motibu pa Van ‘t Hoff su baimentu, ‘e fundashon lo a konstruí esaki hopi tempu despues’.
E kòntrakt entre SGB i Van ‘t Hoff ta disolvé pa dia 1 di desèmber. Banda di esaki e skol mester paga e èks direktor un kompensashon. Segun wes e skol por a ‘limita e daño hopi’ si a djis ofresé Van ‘t Hoff un otro funshon den SGB. E kompensashon no ta bai pa kuenta di enseñansa, asina Hustisia ta bisa, pasobra den medionan di komunikashon e skol a anunsiá ku ‘e aña aki ta bai bon ku finansanan’.
Sin trabou
Van ‘t Hoff por bai di akuerdo ku e altura di e kompensashon, pero, e ta bisa mésora, “Dje agradabel ei e kos no ta tampoko. Mi no tin trabou mas, mi no ta traha den enseñansa mas, mientras ku semper mi tabata gusta einan.”
Outor Janita Monna