Minister Plasterk – potrèt: Arién Rasmijn
ORANJESTAD – Minister Ronald Plasterk (Relashonnan den Reino) ta bai mustra su kolega-minister Bert Koenders di Asuntunan Eksterior riba e prekupashon di Aruba pa e kantidat kresiendo di turista di creditcard venesolano ku ta bini Aruba. Esaki el a bisa durante un enkuentro ku prensa lokal.
E minister tabata di bishita di trabou na Aruba pa un dia. Anteriormente Plasterk a duna di konosé na Tweede Kamer ku e tabatin kontakto ku gobièrnu arubano tokante e kantidat di venesolano ku ta bini Aruba i ku por lo pronto e no ta prekupá.
Entretantu el a adaptá e opinion aki, segun e ta bisa despues di kombersashonnan ku entre otro e partnernan sosial pero tambe pa motibu di su propio opservashonnan. “Lo mi pasa mi kolega Koenders e mensahe un bia mas ku aki ta trata di un situashon potensialmente serio.” Plasterk ta konfirmá ku promé minister Mike Eman a manda un karta pa Koenders kaminda e ta ekspresá su prekupashonnan.
Refineria
Na Aruba Plasterk a bishitá e refineria na San Nicolas tambe. Un komishon di eksperto lokal i hulandes e luna aki lo a duna konseho tokante startmentu di e refineria di nobo si òf nò. E kompania di zeta merikano Citgo aktualmente ta interesá den e refineria. Segun Plasterk e konseho ei no t’ei ainda.
Durante su bishita a pone e minister na altura tambe di e eksplorashon di gas den e awanan teritorial di Aruba. E ta nenga ku Hulanda lo tin un interes direkto den un re-apertura di e refineria.
Outor Ariën Rasmijn