E bòrchi den kurá di Chago Melaan – potrètnan: Janita Monna
KRALENDIJK – E bòrchi den kurá di Chago Melaan no por tabata mas kla: “Referèndem 18 di desèmber, skohe NÒ”, tin pará na lèter grandi. Anto abou: “Minder Makambas!”(Ménos makamba, trad.).
E kampaña ku mester yama hende pa bai vota dia 18 di desèmber a kuminsá. Riba kaya mas parti ta mira esnan ku ta bisa vota ‘Nò’. No solamente den kurá di Melaan sino na otro parti di Boneiru tambe tin bòrchi ku teksto manera “Bo ta kontentu ku e situashon for di 10-10-10? Nò tòg?” Na e sede di Nos ke Boneiru Bèk, den e kurá di hunga na Playa ta bende t-shirt ku e ‘Nò Nò Nò’’ riba nan.
Laso direkto
Habitantenan di Boneiru aki seis siman por kontestá e pregunta si nan ta di akuerdo ku e manera ku a ekspresá e laso direkto ku Hulanda. Pa pèrkurá pa nan por skohe bon, a instalá un komishon independiente di referèndem, ku ta bai duna e votadónan informashon.
E komishon di referèndem, den meimei presidente Douwe Boersema
Presidente di e komishon Douwe Boersema: “Nos ta trese informashon neutral i ophetivo. Bestuurscollege a nombra nos, pero nos no ta hasi rospondi pa Bestuurscollege. Ku esaki Boersema ke men e akuerdo di gobernashon kaminda e partidonan di koalishon UPB i PDB a palabrá tokante e direkshon mas outónomo ku Boneiru mester tuma segun nan.
Hiba kampaña nechi
E komishon den e simannan ku ta bini entre otro lo publiká boletin di informashon. Lo tene anochinan informativo , Boersema ta bisa: “Gustosamente nos ta aseptá invitashon di kompania i otro instansha ku ke mas splikashon tokante e pregunta di referèndem, e posibel implikashonnan di un ‘si’òf un ‘nò’ i otro asuntu ku e referèndem aki ta trese kuné.” Boersema ta enfatisá ku e komishon di referèndem no ta mete den diskushon polítiko. “Esei no ke men ku nos no ke e kombersashon ei. Nos ke si pa hiba kampaña nèchi.”
Entretantu a lanta un diskushon grandi tokante e bòrchi di Melaan. Elvis Tjin-Asjoe, miembro di Eilandsraad pa e partido di oposishon MPB, ta bisa ku e tin bergwensa di e ‘manera di hasi repudiabel’ aki. “E ‘Grupo Nò’ ta hasi uso di práktikanan nashonalista, rasista i manipulativo pa logra nan meta ‘Boneiru for di Hulanda’. Hende di Boneiru ta konosí komo modesto i ku bon manera. Unda e karakterístikanan aki a keda?”
Melaan ta haña ku Tjin-Asjoe no por lesa. “Mi no ta kontra hulandesnan. Pero na Boneiru tin muchu hopi” E ta mustra riba Hulanda “Ei tambe nan ke ménos buskadó di asilo, n’ta bèrdè? Awèl pakiko ami si no por bisa esaki?” E mes a mira for di 2004 ku e laso direkto lo no bai bon. “Hulanda a rekolonisá Boneiru di nobo. Nan ta komporta nan mes manera bendedó di esklavo. Nos mes diputadonan no tin nada di bisa. Tur hende tin miedu ku e isla lo no haña plaka mas si nos bira outónomo. Ami ke libertat.”
James Finies ta demonstrá e t-shirtnan ‘No No No’
Bandera ‘Nò’
Den e ofisina di Nos ke Boneiru Bèk e banderanan ‘Nò’ta kla pa pega riba e kasnan. James Finies, defensor di e referèndem: Nos ta bai den bario e tempu ku ta bini aki, pa duna informashon, nos a traha pamfleta spesial. Lo bira un tempu kandente.”
Outor Janita Monna