E frakshon di PAIS durante e konferensha di prensa tokante baimentu di Marilyn Moses – potrèt: Anneke Polak
WILLEMSTAD – Gobièrnu di promé minister Ben Whiteman a pèrdè su mayoria den parlamento. Djabièrnè meinta Marilyn Moses di partido PAIS a revoká su sosten na e koalishon. El a sali for di e partido i e ta sigui komo miembro di Staten independiente.
E parlamentario ainda no ke duna un reakshon públiko. Den un karta na presidente di e partido i na lider polítiko di e partido Alex Rosaria, Moses ta skibi: “Ta hopi kos a trese mi na e desishon aki. E rumbo di e partido ta desviá muchu di e puntonan di salida ku e ta basá riba dje.”
Doló
“Tabatin kestion ku nos medidanan lo a duna ekonomia un empuhe”, asina Moses ta sigui. “Pero nan ta hasi mi pueblo doló. Tuma e oumento di impuesto di benta, e subimentu di edat di penshun i e introdukshon di un sistema nobo di seguro médiko. A primintí kresementu ekonómiko i bienestar pa habitantenan di Kòrsou. Pero mi no ta mira e atenshon, e medidanan i e inovashon nesesario pa esakinan.”
Segun Moses tin miembro di partido ku no ta para pa e loke ku nan mester para p’e. “Solamente pa tene e koalishon na bida ku un gobièrnu ku ta tuma desishonnan zorokloko.” Moses te referí na konstrukshon di e hòspital nobo; e fail ei tampoko no ta sufisientemente transparente segun e.
Segun Moses nan ta bisa ku e pashènt no ta sangra mas. “Pero niun hende no ta wak e pashènt su pòls, e pashènt ta muri. No tin niun sorto di miserikordia pa mi pueblo.” Moses ta kaba su karta ku e komentario ku miembronan di parlamento a hura ku nan lo sirbi pueblo. “I ami ta para tras di mi huramento.”
E chèns ta chikí
Promé minister Whiteman no a reakshoná ainda. E koalishon e dianan ku ta bini ta bai buska un mayoria nobo. MAN, PAR, MFK i e miembro di Staten independiente a laga sa kaba ku nan no tin niun interes.
Outor Dick Drayer