Junior Chamber International Curaçao – potrèt: Dupal Persaud
WILLEMSTAD – E siman akí 16 miembro di JCI Dutch Caribbean, spesífikamente di Curaçao, St. Maarten, Aruba i Boneiru a asistí e kongreso annual di JCI na Hapon. Durante di e kongreso a selebrá 100 aña di e organisashon i alabes elehi e hunta internashonal di Junior Chamber International (JCI).
E aktual JCI EVP vice presidente, Candice Henriquez di Kòrsou, a keda elehi komo vice presidente ehekutivo internashonal. Tambe e kapítulo di Karibe Hulandes a keda otorga e sertifikado di 100 porshento efisiensia pa a kumpli ku e normanan general di e organisashon.
‘Global Village’
Ret Karibense a kòmbersá ku Dupal Persaud, e presidente lokal di JCI- Creative Leaders In Curaçao pa 2015, i Tiffany Cristina, e presidente entrante, di JCI – Creative Leaders In Curaçao. Durante e konferensia na Kanazawa, Hapon, Dupal i Tiffany a asistí na diferente evento i entrenamentu, i alabes a partisipá na un ‘Global Village’ unda tur kapítulo internashonal a presentá nan pais.
Tambe Dupal i Elton Villarreal di Kòrsou, a duná diferente training durante e kongreso. “Mi seshon tabata yen, pues ami ta satisfecho”, Dupal a kompartí. “Maske nos isla ta chikitu, tòg nos ta yegá na eventonan internashonal pa interkambio di konosementu”, ela agrega.
Miembro aktivo
JCI tin más ku 55 aña aktivo riba nos isla i ta konsistí di IOBA Curaçao, JCI United Citizens of Curaçao (UC), JCI Willemstad i JCI Creative Leaders In Curaçao (CLIC). 14 di Òktober último, JCI – Creative Leaders In Curaçao (Dutch Caribbean), kual ta un reavivamentu di Female JCI i JCI Wayaká, a selebrá su 40 aniversario i aktualmente tin 14 miembro aktivo. Dupal ta enfatisá ku JCI no ta un club de servisio, pero un organisashon ku ke desaroyá liderazgo bou di hóbennan ku e meta pa kreá instrumentonan ku ta trese kresementu. Na Kòrsou tin más ku 100 miembro aktivo di e organisashon JCI.
Según Dupal i Tiffany, ora bo ta miembro di JCI, kende ta pa hóbennan entre 18- 40 aña, bo netwerk ta krese i ta konektá bo ku diferente hende ku ta pensa similar. E hóbennan ta rekonosé ku e membresia pa tipo di organisashon manera JCI a baha e lastu dékada. Pa motibu di akseso di informashon via di internet, e hóben tin más informashon pa desaroyá su mes, nan a splika.
“Esaki ta fenómeno mundial, i ta keda tratá durante e vários enkuentronan”, Tiffany a bisa. “Pa garantisá e kontinuidat, e organisashon internashonal a sera un aliansa ku Kiwanis internashonal, pa traha riba tema i proyektonan similar”, Dupal a kontinuá. “Asina ta sera un buraku generashonal, pasobra awó e miembro di JCI, despues ku e hasí kuarenta aña, por bira miembro di Kiwanis”. E kontakto ku Kiwanis di Kòrsou a keda hasí kaba, pa asina den 2016 por sinta i deliniá e diferente projektonan ku por kolaborá riba dje.
Focus
JCI CLIC no a sinta ketu i dia 9 di yanüari último, a instalá ocho miembro i a kreá un wepsait nobo. Na aprel tambe nan a organisá e evento ‘Stand Out Of The Crowd’ i alabes a organisá un kaminata kual a kreá hopi atenshon pa JCI CLIC. Manera ta kustumber, JCI CLIC a organisá un entrenamentu pa duna diskurso públiko pa públiko general. “E enfoke di JCI CLIC ta ku e miembro ta disidí kon e ke desaroyá su mes”, ela kontinuá. “Si nos ta determiná kiko e área of focus di e grupo ta, pa asina sigurá kresementu bou di e miembronan”, Tiffany a agrega.
Outor Deya Mensche