Un di e bakinan di Ocycle na entrada di un supermercado na Paradera – potrèt: Ariën Rasmijn
ORANJESTAD — Un compania local na Aruba a cuminsa colecta zeta di cushina bieuw for di residencianan. E idea ta pa recicla e zeta bieuw y combirtie den biodiesel.
Na diez supermercado a pone bakinan blauw, den cual por deposita boter cu zeta bieuw. E idea ta pa colecta e contenido di e bakinan aki dos biaha pa siman.
“Tin 30.000 cas na Aruba cu alrededor di 110.000 habitante. Si tur hogar consumi un averahe di cinco liter di zeta pa aña, bo por imagina cuanto ta wordo benta den pos di riool y den landfill. Riba dje bo tin cu corda cu cada gota di zeta cu bo ta tira afo, ta un cu bo mester importa bek di un manera of otro”, asina Patricia Mitton, director di Antilla Energy ta splica.
E compania ya caba ta recicla zeta di cushina cu nan ta bende na hotelnan y restaurantnan, combertiendo esaki den biodiesel. Cu e servicio cu ta carga e nomber ‘Ocycle’, kier haci mescos atrobe pero awor cu zeta biniendo for di casnan. Mitton ta duna di conoce tambe cu e proyecto aki ta uno den cual gobierno di Aruba no ta envolvi, aunke cu na comienso si a reuni cu nan pa wak e posibilidadnan.
Mitton: “Nos a papia varios biaha cu nan pa wak con nan por yuda, pero nos tur sa cu gobierno ta tuma hopi mas largo cu un compania priva por haci. Nos a tuma e iniciativa pa haci algo cu ya caba ta traha por ehempel na Hulanda. Y si eynan por, pakico no hacie akinan?” Antilla Energy recientemente a haya un injeccion financiero di 4 miyon dollar cu e proposito pa hisa e volumen di conversion di zeta bieuw pa biodiesel di 400.000 liter pa 5 miyon liter pa aña.
Autor Ariën Rasmijn