E partido hel ta djòin e koalishon di PAIS, PS, PNP i Sulvaran – potrèt: Anneke Polak
WILLEMSTAD – E koalishon bieu a logra tòg haña partido di oposishon PAR na bordo. Ku un mayoria di diesdos asiento gabinete Whiteman II lo tuma mando te na elekshonnan na sèptèmber di otro aña.
“Mester establesé algun asuntu, e partidonan mester indiká ken lo bira nan ministernan kandidato, pero mi ta kere ku esaki lo no tin nodi di tuma hopi tempu”, promé minister demisionario Ben Whiteman (PS), ku awe meinta gobernador a nombra komo formadó, ta bisa.
Deliberashonnan anterior ku PAR no tabatin resultado, i despues Whiteman mester a entregá retiru di su gobièrnu. Despues komo informadó e por a habri e negoshashonnan atrobe. “El a logra haña nos rònt di mesa atrobe, pasobra nos a yega hopi leu. Awor nos a yega na e puntonan klave”, lider di frakshon di PAR, Zita Jesus-Leito ta bisa.
Stabilidat
E motibu di mas importante di PAR pa djòin e koalishon bieu tòg, ta e echo ku Kòrsou mester di sosiegu, Jesus-Leito ta bisa. “Pueblo meresé sosiegu i stabilidat. Tin muchu asuntu di suma importansha pa atendé, pa bai tene elekshon den temporada di karnaval. Ademas nos a komprondé di e sektor komersial ku tin desaroyo ku por kontribuí na un mehorashon di ekonomia.”
Niun hende no ke duna detaye ainda, e partidonan PAIS, PAR, PS, PNP i e miembro di Staten independiente Glenn Sulvaran a palabrá pa no duna informashon na medionan di komunikashon te ora kaba di palabrá tur kos. T’asina si ku Jesus Leito ta konfirmá ku PAR por tuma e kartera di Desaroyo Ekonómiko. Ainda e no ke bisa ken lo susedé minister saliente Stanley Palm (PAIS), pasobra promé mester warda e screening.
Marvelyne Wiels
Anteriormente PAR a indiká ku nan ke remplasá minister plenipotensiario Marvelyne Wiels tambe. E lider di e frakshon por konfirmá ku tin un akuerdo tokante e puesto aki, pero ainda e no ke duna detaye tokante di esaki.
Djabièrnè Whiteman ta entregá un rapòrt provishonal di e formashon na gobernador Lucille George-Wout.
Outor Anneke Polak