E camber hiperbarico na Baby Beach – potrèt: Ariën Rasmijn
ORANJESTAD — E camber hiperbarico cu na februari di e aña aki a wordo instala na Aruba te ainda no ta den uzo. Esaki Rudy Davelaar, presidente di Aruba Hyperbaric Foundation, ta duna di conoce na Red Caribense. Segun Davelaar e no a logra haya cooperacion for di hospital y fondo di seguro di cuido AZV.
Director di AZV Anco Ringeling di su banda ta duna di conoce cu e nunca a wordo aserca y cu hospital mes mientras tanto ta biniendo cu su propio camber hiperbarico, pa locual AZV tambe ta dispuesto pa co-financia. Theo de Kool, director financiero di hospital, ta bisa su banda sinembargo cu na momento aki hospital ta djis studiando e posibilidad di tuma un camber hiperbarico.
Ariën Rasmijn den combersacion cu Davelaar, Ringeling y De Kool
Pa casi un aña largo e camber hiperbarico ta para den un sala di un centro di buceo serca Baby Beach, sin wordo opera. Buceadornan cu ta haya nan mes den problema den awanan local ta wordo transporta pa Boneiro pa nan tratamento, y diabeticonan no tin acceso na terapia hiperbarico pa nan heridanan.
Segun Davelaar, cu a paga alrededor di `175,000 florin pa cumpra y entre otro transporta e aparato, e ta cla pa traha pero no por haci esaki sin tin acuerdonan di operacion y pago cu Horacio Oduber Hospital y AZV. E ta bisa cu el a aserca gerencia di e hospital diferente biaha pero no a haya respuesta. Davelaar no a tuma contacto cu AZV, pasobra e ta haya cu e prome contacto lo mester ta cu hospital. Mirando cu esaki te aworaki no ta tumando lugar, e ta invitando parlamentarionan pa pasa bishita e camber hiperbarico y pone riba nan agenda.
‘No sa di existencia’
Director di AZV Anco Ringeling ta confirma cu berdad Davelaar no a tuma contacto cu e fondo di seguro. Esey ta haci segun Ringeling cu AZV ‘no sa di existencia mes’ di e camber hiperbarico serca Baby Beach. Sinembargo, e director di e fondo di seguro ta duna di conoce cu hospital mes ta trahando riba un proyecto na unda nan mes lo ofrece servicio di camber hiperbarico, algo cu AZV mes ta dispuesto pa yuda financia. “Aworaki nos ta discutiendo cu nan con pa set up esey”, segun Ringeling.
‘Sondeando posibilidad so’
Theo de Kool, director financiero di hospital, ta bisa cu e ponencia di Ringeling cu tin plan pa cumpra un camber hiperbarico ta ‘un par di stap mucho leu ainda’. Segun De Kool ta investigando ainda si un camber hiperbarico ta util y necesario. “Ta pregunta ainda si un apmliacion di cuido asina ta asina necesario pa hinca placa aden. Den e sentido ey mi ta cauteloso pa cu esaki.” E ta bisa cu el a tende cu tin un aparato na Aruba. “Pero mi no sa si e aparato aki ta loke nos lo mester pa duna cuido na buceador y tambe diabeticonan.”
De Kool ta nenga cu el a wordo aserca pa Davelaar. Ademas e ta haya straño cu a inverti den e camber hiperbarico, pa despues numa dicidi pa tuma contacto cu hospital.
Autor Ariën Rasmijn