GVI a manda sinku mucha di Internat pa mucha di Brakapoti kas, sinku pa JJIC i sinku pa New Creation – potrèt: Anneke Polak
WILLEMSTAD – Miéntras ku ku e direktiva di Internat pa mucha di Brakapoti ta kontemplá pa bai wes pa haña e diessinku muchanan ku a saka for di e internat bèk, Jennifer Lindo-Snijders di Gezinsvoogdij Instelling (GVI) ta kontentu ku e hóbennan no ta den e internat mas. “Nos no ta pone niun hende mas eiden te ora ku a investigá tur kos rigurosamente.”
Espesialmente e papel ku e direktiva di e Internat a hunga Lindo-Snijders ta haña dudoso. “Awor yen di rumor ta yega serka nos ku e direktiva añanan largu sa kaba kiko ta sosodiendo den e internat. Un èks direktor a asta tuma su retiro pasobra e direktiva no a tuma akshon kontra un di e dos guiadónan, ku anteriormente kaba a sospechá di abusu seksual ku mucha.”
Di e diessinku muchanan ku a saka a manda sinku kas, sinku awor ta den den Justitiële Jeugdinrichting Curaçao (JJIC) i sinku a bai e fundashon New Creation na Otrobanda. “Un di e hobennan ku a bai New Creation a purba mata kurpa” visepresidente di e Internat di mucha di Brakapoti Monte Horsford ta reakshoná. “Ta esaki ta e konsekuenshanan di e akshonnan di GVI. Tabata un akshon ilegal i mal pensá i djaweps mi ta deliberá ku un abogado pasobra nos ta kontemplá di bai wes.”
Inklinashon pa suisidio
Lindo-Snijders ta konfirmá ku un di e hóbennan ku a hiba otro kaminda ta lucha ku inklinashon pa suisidio, pero e ta indiká ku e hóben a deklará serka sikiatro ku na Internat di Brakapoti e tabatin e inklinashonnan aki kaba.”E asuntu tin nos atenshon, nos ta wak si kisas e tin algu di hasi ku su remedinan.”Lindo-Snijders ta ninga ku un di e hóbennan ku a trasladá pa JJIC no ta kome mas. “E no ta kome bon pero esaki tabata e kaso kaba promé ku a traslad’é. E ta konsiente si ku e mester kome algu i e ta hasi esei tambe.”
Protekshon di mucha
Entretantu e Internat a tuma kontakto ku Kinderbescherming (protekshon di mucha) pasobra e koperashon ku GVI ta bai difísil i pasobra nunka un traspaso profeshonal no a tuma lugá. Tabatin e petishon pa atmití guiadó di e internat na New Creation, pero e fundashon na Otrobanda a ninga esaki, segun Internat di mucha di Brakapoti.
Ainda GVI ta para tras di nan desishon: “Nos a sinti doló i sigur no t’asina ku nos no tin kunes, pero nos ta keda para ariba ku esaki ta e mihó pa e muchanan. Sigur awor ku nos ta kuminsá tende mas kos. Pakiko no a aktuá? Kiko ta e papel di e direktiva den esaki? Ministerio Públiko (OM) mester investigá esaki mas pronto posibel.”
Bosero di OM Norman Serphos ta konfirmá ku tin un investigashon penal ta kana di abusu seksual na Internat di mucha di Brakapoti kontra dos sospechoso, ku for di mart di e aña aki a denunsiá. E no por bisa ki dia e investigashon aki a kuminsá. “OM konosé hopi prioridat, entre otro solushon di e asesinato di Helmin Wiels. Ademas atrako ku arma i asesinato ta pará haltu riba agènda. Ta determiná e prioridatnan huntu ku minister di Hustisia. Abusu seksual naturalmente tambe ta un prioridat, meskos ku hòrtamentu di outo, kiebro den kas i otro asuntu ku OM ta dil kuné diariamente.”
OM ta enfatisá ku na 2015 sigur sigur a solushoná kasonan di abusu seksual, entre nan esun di un wardadó na JJIC ku habitantenan menor di edat di e instituto, un tata di kriansa ku su yu muhé menor di edat i un persona di 18 aña ku tabatin un relashon ku un persona di 11 aña.
Outor Anneke Polak