Zita Jesus-Leito | Potrèt: Dick Drayer
WILLEMSTAD – “PAR no ta djis djòin; ta ku e fail di Ekonomia nos ta bai hasi e diferensha”, asina e presidente di frakshon di e partido hel ta bisa ora ku djadumingu anochi e presentashon di e akuerdo di gobernashon a kaba.
Su dos asientonan ta duna legitimidat demokrátiko na e koalishon di PS, PNP, PAIS i miembro di Staten independiente Glenn Sulvaran.
For di elekshonnan di oktober 2012 hopi a kambia den e komposishon aktual di Staten. Miembronan anterior di PAR Glenn Sulvaran i Omayra Leeflang meskos ku Marilyn Moses di PAIS a bandoná nan partido i bai ku nan asiento. E ganadó di mas importante di elekshon, Helmin Wiels, tabatin un di sinku parti di tur voto i a asasin’é.
Legitimidat
Tòg Jesus-Leito ta haña ku no tin motibu pa bai bèk serka e votadó i asina haña legitimidat pa un gobièrnu nobo. “Komunidat a aserká nos, pa medio di komersio, sindikatonan i ‘captains of industry’, ku e pais tin nesesidat di stabilidat; elekshonnan nobo lo para tur kos”, segun Jesus-Leito. “Esaki ta demokrasia, nos ta hasi uso di e posibilidatnan ku tin.”
PAR tabata ke pa Marvelyne Wiels kita komo minister plenipotensiario. Ainda e partido ke esaki. Pero Jesus-Leito ta rekonosé ku e puesto ta pertenesé na ministerio di Asuntunan General, bou di promé minister i pései ta na enkargo di Pueblo Soberano: “Bo no por haña tur kos, pero nos a hasi palabrashon adishonal sí tokante su papel den Kas di Kòrsou.”
Kiko e papel ei ta nifiká lo sali na kla e siman binidero. Meskos lo sali ta kon PAR lo bai hasi e diferensha na Ekonomia, e puesto ku e lo haña. E nòmber di e minister ei ta konosí: èks diputado i yu pródigo Eugène Rhuggenaat ta bèk. “Bon mirá nunka e no a bai kompletamente”, Jesus-Leito ta bisa.
Outor Dick Drayer