Didi, Roën, Juranklin, Eldrion – potrèt: Deya Mensche
WILLEMSTAD – Dia 29 di Novèmber, 2015, Eldrion Regina i Roën Trinidad, lo tin un enkuentro gratis na University of Curacao (UoC) di 5 pa 8 di anochi, unda e públiko por hasí pregunta i kòmbersá riba diferente tópiko interesante pa yega na un bida yená ku propósito. Eldrion Regina di 29 aña di edat, ta hasiendo furor ku su videonan inspirashonal i charla bon bishitá. Su mensahe ta simpel, buska inspirashon den tur kos i lo bo haña bo mishon riba e mundu akí. E mensahe akí sigur a atrae e hóben Juranklin Marten, kende a hasí tur esfuerso pa por a asistí na e charla.
Eldrion a opservá un persepshon negativo propio ku hopi yu di Kòrsou tin, pero niun hende ta trata di kambia. Ku su pelíkulanan inspirashonal kòrtiku, kual e ta publiká riba su página di Facebook ku tin mas ku 7 mil siguidó, Eldrion ta purba trese kambio den esaki, pero ta insistí ku e no ta simplemente un orado di motivashon. “Mi ke duna e persona liña pa piska i para na e otro banda di baranka i mustr’e kon ami a piska”, ela splika.
Vishon
Eldrion a uni forsa ku èks militar, Roën Trinidad, inspirá pa su eksperensianan na Afganistan, i Didi Gregorius, short stop di Yankees, pa duna su promé charla na Kòrsou. Mas ku 300 persona a reuní pa skucha kon importante ta pa determina bo mishon, bo vishon, i últimamente bo strategia di bida.
Juranklin Marten di 18 aña di edat, studiante di Electro na MTS, a tende di Eldrion i su pelíkulanan kòrtiku via di Facebook i na skol. E hóben ambisioso, kende ta propietario di J System Design, a bai yuda bende kuminda serka un konosí, pa por a sera e sèn pa bai e evento. E mensahe mas importante ku Juranklin a tende ta ku si nos ke logra algu, nos mester enfoká riba nos meta. Tambe a resoná serka Juranklin, kon Eldrion ta enfatisá durante su charla pa nos no kibra otro i pa tene kuenta ku opinion di otro hende por kita bo of stroba bo di bai dilanti. “E ta djis un opinion, i no nesesariamente ta un echo”, ela deklará.
Un par di dia despues, Roën a topa ku Juranklin na su ofisina, unda nan a kòmbersá di Roën su eksperensia di servisio militar i Afganistan. “Mi a mira hopi kos hororoso i mi mester a yuda i kuida mi koleganan i asina a realisá kon frágil bida ta”, Roën a splika Juranklin. E eksperensianan akí a resulta den Roën su diagnosis di PTSS (trastorno di strès postraumátiko). Apresar di esaki, Roën a logra kompletá su estudio komo supervisor finansiero HBO na e instituto LOI. Finalmente Roën a disidí na 2013 pa regresa Kòrsou pa kuminsá un negoshi yama Oportunity Finance, kual ta un karchi di krédito pa sumanan chikitu. E ta spera di habri su portanan na Desèmber 2015. “E kòmbersashon a inspira mi kon mi ta bai kombertí mi propio kompania di filmashon i media den un eksito”, Juranklin a konklui.
Sponsor
Nunka tabata e intenshon pa Eldrion lanta un fundashon, pero ora ela traha e promé pelíkula kòrtiku, esaki a kai den asina bon tera, ku e kier produsí mas, pero esaki tin su gastunan mara na dje. “M’a siña di e eksperensia i awó mi tin mihó bista kon Kòrsou ta funshoná ora di pidi sponsor”. Pa 2016, e mensahe drenta tur skol, of lo mester trese e hóbennan huntu na un lokalidat, paso Eldrion a konstatá ku durante un charla e mensahe ta yegá mas miho n’e. “E nuebe pelíkula kòrtiku ku a sali fo’i kuminsamentu di yüni te febrüari 2016, lo bira un buki unda e ke hasí mas hende konsiente di e e mensahe.”
Outor Deya Mensche