Miembro di Tweede Kamer Anne Mulder (VVD)
DEN HAAG – VVD ta rabiá tokante reportahenan anterior ku e partido lo ta trata di tarda introdukshon di plaka pa yu na islanan BES. E partido ta kontradesí esaki. Sí t’asina ku e frakshon ta eksepshonalmente krítiko riba e proposishon aktual.
Agenda di Tweede Kamer ta yen. Pa akselerá introdukshon di e proposishon di lei tur partido a bai di akuerdo pa hasié un propuesta ku ta aseptá sin voto ni diskushon. E ora ei no ta deliberá riba e proposishon di lei. VVD tabata kontra di e prosedura aki. Miembro di Tweede Kamer di VVD Anne Mulder: “Mester papia tokante un proposishon di lei. No t’asina ku nos ta usa táktika di retraso, nos djis ke un tratamentu òrdènt di un lei.”
E parlamentario ta kontradesi tambe ku ta retrasá e lei. “Ta trata e proposishon awe nochi (ora hulandes) i mayan ta vota p’e. Lo no tin niun sorto di retraso. E sala plenario ta okupá. P’ései nos a reservá un otro sala, espesialmente pa por tene e debate aki awe nochi.” T’asina si ku ainda e lei por kuri retraso si partido di gobièrnu VVD vota kontra e proposishon.
Nivel di previshon
Mulder: “Nos pregunta prinsipal ta: kiko nos ta haña ku e nivel di previshon mester ta na e islanan? Kon haltu e norma mester ta? I e proposishon aki ta pas serka e norma? No por haña kontesta riba e preguntanan aki. Ofisina Sentral di Estadístika ta investigá e norma aki, pero nan no a sali afó ainda.
E plaka pa yu na Hulanda oropeo ta hopi mas haltu ku den e proposishon di lei pa Hulanda karibense. Mayornan na Hulanda, dependiente di e edat di e yunan, ta haña entre 63 i 91 euro pa luna. Na Boneiru, Statia i Saba mayornan ta haña 38 dòler pa luna, si aseptá e proposishon di lei. E echo ku islanan BES ta kai bou di Hulanda Mulder no ta haña krusial. “Segun nos e palabrashon ta previshon ku ta pas den e region.”
Deskuento di yu
Na Hulanda karibense anteriormente a reakshoná ku rabia i horor riba e altura di e suma. Aktualmene mayornan riba e islanan BES ta haña solamente deskuento di yu, ku nan por kita di nan impuesto di entrada. P’esei mayornan ku ta paga poko impuesto, apénas ta probechá di dje.
Outor Pieter Hofmann