E lèsnan ta konsistí di teoria i práktika i tin un buki di lès pa guia e lèsnan – potrèt: Elisa Koek
WILLEMSTAD – Di ‘sòpi di plèstik’ plamá rònt mundu, te ku sobrá di bleki ku un morkoi di Kòrsou pegá aden. E lesnan di GreenKidz Curaçao ta konfrontá mucha ku e konsekuenshanan di sushamentu djaleu i djaserka. Asina serka asta, ku nan mes tin mag di surti nan propio saku di kos sushi.
GreenKidz ta un koperashon entre skolnan i esnan ku a tuma e inisiativa Maya Mathias i Yvonne Zegveld. Intenshon di e proyekto ta pa hasi mucha konsiente di un ambiente limpi.
Surti sushi
Gruñamentu i kehamentu ta sali for di e biblioteka na Sint Antoniusschool. Seru di sushi tin riba e mesanan i e alumnonan ta para ku stoma ku ta wal i ta hari ki ki ki. ”E ta hole masha stinki mes”, e muchanan ta grita mientras ku nan ta pega otro ku zonidu di walmentu.
Toch niun di nan no ta hala kita pa limpia e sushedat. Nèchi nèchi nan ta pone bleki serka bleki, bòter serka bòter i ta bari sobra pone huntu. “Ta importante pa resiklá, pasobra asina por usa un kos atrobe”, Deva Dee di 12 aña ta bisa. “Na kas nos ta hasié kaba pero mi ta haña ku mas hende mester hasié.”
Lèsnan
E surtimentu di sushi ta un di e partinan di e lèsnan di GreenKidz. E kick-off di GreenKidz a tuma lugá durante Curaçao Clean Up. Diferente skol a partisipá ku e limpiamentu di sushi lòs riba Kòrsou. Despues nan a bishitá e kaminda ku ta tira sushi na Malpais. Awor e proyekto ta den e di tres fase: e lèsnan di GreenKidz mes.
E lèsnan ta konsistí di teoria i práktika i ta bai akompaña pa un buki di lès. “Nos a pensa bon tokante di e materia di lès i nos a desaroya esaki den koperashon ku e skolnan”, Mathias ta konta. “Ta importante pa e informshon ta kla, pero e mester ta interesante tambe.”
Esaki aparentemente ta traha bon, pasobra e muchanan ta hopi impreshoná pa e informashon. “Mi no tabata sa ku bals ta keda pegá riba kaya 25 aña. Mi no ta bai tir’é riba kaya nunka mas”, Deva Dee ta bisa. “Tur hende ku keda hasié mi ta bai papia ku nan. Mi ta bai bisa nan ku ta malu pa medio ambiente i ku no mag.”
Futuro
Seis skol te fin di aña ta haña les di GreenKidz. Despues lo evaluá ku e skolnan.. Nos ke hasié un proyekto duradero”, Mathias ta sigui. “Nos ta bai envolví kompanianan den e lèsnan pa asina nan por duna un aporte i tambe mustra kon ta prosesá nan sushi manera mester ta. Nos tin konfiansa ku nos por kontinuá GreenKidz.”
E konfiansa aki no téi serka GreenKidz so. Djadumingu a rekompensá e proyekto ku e Sustainable Innovation Award 2015. E lèsnan di GreenKidz probablemente lo drenta e próksimo fase na aprel.
Outor Elisa Koek