Hunter Pence – potrèt: Deya Mensche
WILLEMSTAD – E siman di beisbòl, patrosiná pa Blue Bay, a kuminsá en gran forma. Banda di e aktividatnan deportivo ku ta tuma luga na Tio Daou Ballpark, hopi atenshon ta keda duna na e materia di e wega. Tambe DABA – Dutch Antilles Baseball Academy – funda pa Hensley Meulens, a trese e talentoso Hunter Pence di San Francisco Giants komo orador prinsipal durante nan ‘fundraiser’.
Djasabra ultimo a toka turno na e coachnan lokal, kende a asistí diferente seminario i klínika duna pa legendario coachnan manera Ron Wotus, Jim Jones i Robert Coffie, i alabes Steve Jansen i Martijn Nijhoff di Hulanda. Tambe e promé klínika di Little League a tuma luga, unda aproksimadamente binti hungadó profeshonal a entrena ku e muchanan.
Deya Mensche den kombersashon ku Yossua Ferreira i Eljereau Franscisca
Potrèt: Deya Mensche
Hopi talento
Según coach di Ben Thijssen, tin hopi talento na Kòrsou i e ta orguyoso kon nos peloteronan ta sakando kara di Kòrsou internashonalmente. “Baseball Week ta un oportunidat pa nos duna bèk na nos komunidat”, ela splika. “Nos ta manda invitashon na tur tim ku ta afilia na Curaçao Little League, e promé dos aña kasi 900 mucha a partisipá” ela añadi. Según Thijssen, ta importante pa nos hóbennan por interkambiá ku coachnan ku por kultivá prospekto kareranan profeshonal i alabes por keda inspira dor di nan eksperensianan.
E vishon akí sigur keda kompartí pa Hensley Meulens, coach di bateo pa San Francisco Giants, kende ta un gran inspirashon pa tur ku bini den kontakto ku n’e pasobra e ta purba di saka lo mehor for di kada hungadó ku e traha ku n’e. “Mi tin mas ku 30 aña ta duna klínika, i durante un luna largu nos tabata bai tur vèlt na Kòrsou”, ela splika. “Awó nos a kambia e formato i a partner ku Blue Bay, unda den un siman nos ta trese e muchanan huntu na Tio Daou i ta duna varios klínika.”
Hensley Meulens – potrèt: Deya Mensche
Según Hensley, 85 porshento di beisbol ta mentalidat i 15 porshento ta físiko. P’esei durante di ‘Spring training’ di e aña akí, Hensley a pidi Hunter Pence pa bin kompartí su eksperensianan. Hunter ta un hungadó ku su aktitut positivo ta legendario i a influensia e tim di Giants pa logra e di dos kampionato mundial ora tur hende a kere ku esaki lo tabata imposibel. “E aña akí, nos tim tin e averahenan di bateo mas haltu den Liga i nos tabatin tres bateadó di plata, kual ta un gran refleho riba Hensley su trabou”, ela splika. Según Hunter, Hensley tin un don pa komprondé kada hungadó su ritmo i konstantemente ta traha riba nos punto fuerte.
Mentalidat
Durante su lektura, Hunter a konta kon espesialmente e aña akí, e mester a adapta un mentalidat di ganado pa por a supera hopi reto físiko ku ela enfrenta pa motibu di leshon. Tambe Hunter ta urgí pa nos tene kuenta ku e poder di palabra. “Wak kiko bo ta bisa bo mes, pasobra si bo no ta kere den ku bo ta un dje mihonan i bo no ta pertenesé den Liga Grandi, lo bo no yega nunka. Mi ta kere ku mi t’akí, pasobra di desishonnan ku mi a tuma den pasado”, ela konkluí.
Yossua Ferreira di 17 aña i Eljereau Franscisca di 16 ta dos hóben ku sigur hopi gradesido pa por partisipá durante e siman akí. “Tabata algu nobo i nunka m’a eksperensia algu asina, unda un coach ta splika bo kosnan chikitu ku por yuda bo hopi den bo manera di hungá bala, Yossua a splika.
Tambe lo partisipá durante Baseball Week e ‘all-star’ pitcher Chris Archer di Tampa Bay Rays. E ultimo klínikanan djárason i djabièrnè awó, pa despues tin un wega amistoso entre e tim di sénior i e hungadónan profeshonal, pa despues kulminá e tan antisipá Homerun Derby.
Outor Deya Mensche
Coaches di Baseball Week – potrèt: Deya Mensche