Geógrafo sosial Marleen Revenberg a investigá e kousanan di dròpout na Kòrsou tres luna largu

Geógrafo sosial Marleen Revenberg a investigá e kousanan di dròpout na Kòrsou tres luna largu

NIJMEGEN – No ta pobresa ta e kousa di e kantidat grandi di hóben ku ta dròpout (kita skol promé ku nan kaba skol) na Kòrsou, pero ta e aktitut inerto di gobièrnu i e skolnan mes. Asina e konklushon di un investigashon sientífiko di geógrafo sosial Marleen Ravenberg ta.

For di añanan nobenta e ministernan di enseñansa ta bati alarma tokante e kantidat di dròpout na Kòrsou. E kantidat di alumno ku ta kita for di enseñansa sekundario sin diploma ta haltu: 36 porshento. Na Hulanda e promedio nashonal ta 2 porshento. “Ministerio di Enseñansa (di Kòrsou) no tin masha kòntròl riba e asuntu. Nan ke kambio, ma nan no tin manera pa nan hasi esaki”, Revenberg ta konkluí.

Pobresa
Revenberg pa su tesina di master tabata na Ministerio di Enseñansa, Kultura i Deporte pa su investigashon. Durante su estadia el a papia ku diferente eksperto lokal i dròpout tambe. “Muchu lihé hende ta bisa e kousa ku tin dròpout ta pobresa. Esaki ta muchu fásil pa bisa.” Sifranan ta mustra ku no ta hasi masha diferensha si bo ta biba den un bario pober òf riku. E ta pone falta espesialmente serka gobièrnu i skolnan.

“Den hopi kaso nan no ta mira e benefisio pakiko siñamentu lo ta bon òf nan ta sigui e ehèmpel malu di nan mayornan”, Revenberg ta bisa. Mayoria dròpout ademas no sa si un di nan mayornan tin un diploma. Nan lo ta lanta hopi bia den ‘famia kibrá’ i for di chikitu no ta motivá nan pa siña. Ni na kas ni den nan ambiente sosial.

E problema parsialmente ta serka e dosentenan tambe. Den algun kaso nan no tin abilidatnan pedagógiko. Nan konosé nan materia, pero segun Revenberg nan no sa kon nan mester duna lès òf motivá.

Enseñansa obligatorio
Na 1991 a introdusí enseñansa obligatorio pero esaki no tabatin hopi efekto ainda. Símpelmente añanan largu kaba no, òf kasi no ta ehekutá e lei. Revenburg ta mira tambe ku no tin hopi skol ku ta kontrolá presensia di nan alumnonan, i asina gobièrnu tampoko no por tuma medida. E echo ku ta solamente un òf dos ámtenar di enseñansa obligatorio so tin na Kòrsou, no ta yuda tampoko. Si parti un but mes esaki segun Revenberg apénas tin efekto. “Asina alumnonan por hasi i laga di hasi manera nan ke.”

Segun e investigashon gobièrnu mester bini lihé ku un kampaña pa konvensé alumnonan i mayornan di e importansha di enseñansa. Na televishon nashonal por ehèmpel mester bini mas programa edukativo. Tambe evitashon di embaraso di tiner i uso di bùs di skol lo por a solushoná un parti di e problemátika.

Te awor ministerio di Enseñansa no a reakshoná riba e investigashon. Minister Irene Dick no tabata alkansabel pa komentario.

Outor John Samson