Bo kòmpás pa referèndem, den meimei presidente Anthony Nicolaas – potrèt: Janita Monna
KRALENDIJK – “Nos ta spera ku hende lo no bai vota emoshonalmente. Ku nan lo skohe loke lo pone nan sinti bon pa añanan largu, no pa dos dia so. Nan por skohe asina solamente si nan haña informashon neutral. “ Asina un di e miembronan a ekspresá e meta di “Bo kòmpás pa referèndem”.
E komishon di referèndem alternativo ke bai duna informashon ophetivo tokante e referèndem binidero. Pasobra ta esei ta falta, segun e presidente di ‘Bo Kòmpás’, hurista Anthony Nicolaas.
E komishon ta un inisiativa sivil i tin miembro di diferente salí: èks diputado Jona Chirino-Felida ta miembro, meskos ku doño di skol di sambuyá Bart Snelders; studiante di lei i kandidato di UPB den último elekshonnan Alexandra Santana ta partisipá, meskos ku miembro di PHU Desiree Croes. Nan tur i mas hende ta haña ku ta importante pa e votadó dia 18 di desèmber por duna un kontesta bon pensá riba e pregunta: ‘Bo ta di akuerdo ku e kontenido ku a duna na e laso direkto ku Hulanda?’
Segun Bo Kòmpás e informashon ku a duna te aworakí espesialmente a trese hopi konfushon. “E komishon ofishal di referèndem den e promé boletin di informashon a duna splikashon tokante e konsekuenshanan di un voto ‘si’ òf ‘nò’. Polítikonan ta bisa otro kos atrobe. Ken ta papia bèrdat?”Anthony Nicolaas ta bisa. Bo Kòmpás si ke papia bèrdat. Nicolaas: “Nos no ta bai duna konseho. Nos ta bai bisa sí kiko ta e konsekuenshanan positivo i negativo di skohe si òf no.” E echo ku algun miembro tin un preferensha pa un eskoho no tin nodi di stroba ophetividat, e presidente ta haña.
Emoshon
Desiree Croes ta yama e votadónan pa ‘skucha tur dos banda i trata di wak sin mira koló polítiko’. Miembro di komishon Jan Janga ke stimulá hende ‘pa lesa mas tantu posibel’: “Buska informashon. No tuma un desishon a base di emoshon.” Bo kòmpás tin un website, nan ta aktivo riba Facebook i nan ke bai organisá enkuentronan den komunidat.
Nicolas no tin miedu ku e informashon di bo Bo Kòmpás solamente lo trese mas inklaridat: “Hende mester por forma nan propio opinion a base di informashon ophetivo”. Segun e, e komishon alternativo di referèndem lo tabata di mas si ‘e komishon ofishal a hasi su trabou’. Den su idea ta falta di tempu ta un kousa adishonal di e skarsedat na suministrashon di informashon kla: “Gobièrnu insular no a ni duna un opinion ainda tokante e rapòrt di komishon Spies. Pakiko tantu purá? Lo tabata mihó si a posponé e referèndem aki.”
Banda di esaki e ta teme froude riba 18 di desèmber. Mustrando riba e karchi di vota ku a entregá e siman ku a pasa e ta preokupá: “djis un pida papel blanku, imprimí ku enk pretu. Esaki ta fásil pa falsifiká. Ken ta kontrolá si tin hende ku lo vota mas ku un bia?”
Supervishon
No a pidi Nashonnan Uní pa supervisá durante e temporada di kampaña i riba e dia di elekshon. Segun èks gezaghebber Glenn Thodé, ku djárason anochi a petishon di e komishon ta duna un splikashon kòrtiku di e implikashonnan di e pregunta di referèndem, ‘esaki ta trese un riesgo: “Niun hende no por bisa aworó si e votadónan a haña informashon bon, òf si e karchinan di vota tabata bon.”
Banda di esaki e ta spera ku ‘e elektorado ta sinti su mes sufisientemente liber pa skohe, awor ku e direktiva a bisa kaba ku nan ta bai vota ‘nò’‘. E koalishon di UPB i PDB a disidí esaki den e akuerdo di goberná. Bart Snelders: “Si ku informashon ophetivo nos por laga dies hende pensa, mi ta satisfecho.”
Outor Janita Monna