Entretantu nuebe tripulante di La Rumbera a yega aeropuerto di Aruba – potrèt: Hilario Doncker
ORANJESTAD – E speedboat ku nuebe hende na bordo ku djabièrnè pasá despues di un fayo den motor a pèrdè na kaminda pa Venezuela, no tabatin pèrmit di sali for di awanan teritorial di Aruba. Asina Directie Scheepvaart ta bisa. E barku no tabatin ekipo di seguridat manera un radio i un GPS.
Djabièrnè a denunsiá ku e boto di rekreashon La Rumbera, ku tabata na kaminda di Aruba pa Las Piedras riba e península venezolano Paraguana a disparsé. E boto no tabata leu di su destinashon ora e dos motornan djafó a paga, probablemente pa falta di kombustibel. No muchu despues wardakosta di Aruba i Kòrsou a kuminsá un búskeda. Mas despues e wardakostanan di Colombia i Venezuela tambe a djòin.
Venezuela no ta koperá
Na promé instansia e outoridatnan venesolano no tabata ke pa e avion di wardakosta buska den nan espasio aereo. Esaki no opstante un akuerdo di ‘search and rescue’ entre Venezuela i Reino hulandes. “Nos a insistí pa buska ei tambe, pero nan a insistí ku nan lo a buska den nan parti i nos den esun di nos”, Randy Paskel, kabes di e supstashon di wardakosta di Aruba ta bisa.
Despues di intervenshon di ministerio di Asuntunan Eksterior di Hulanda wardakosta a haña pèrmit te djadumingu numa pa buska La Rumbera riba awanan venesolano. Tantu Paskel komo Carlyle de Coteau, direktor di Directie Scheepvaart, ta bisa ku lo a fasilitá e buskeda si Venezuela a duna pèrmit mésora. “Bon mirá ta esei ta e motibu ku nan a drif bai te Colombia”, De Coteau ta bisa.
Na final e nuebe nòufragonan a yega seguridat ora nan a yega sufisiente serka di kosta di e luga na kosta kolombiano Punta Espada pa nan mes landa bai kantu. Únabes ku nan a yega tera nan a haña akohida serka e tribu lokal di Wayuu ku a notifiká outoridatnan.
Sin radio òf GPS
Tantu Paskel komo Coteau ta konfirmá ku La Rumbera no tabatin ni radio ni GPS na bordo. Segun Coteau esaki no ta straño pasobra e speedboat formalmente no tabatin outorisashon pa nabegá pafó di awanan di Aruba. “Pero ya, bo no por stòp hende di hasi kos di bobo.” E echo ku e barku por a sali ku tantu pasahero pa un destinashon ku e no tabatin pèrmit p’e formalmente ta algu ku segun Paskel i De Coteau no por kontrolá ku e kantidat grandi di tráfiko di barku ku tin.
Legislashon nobo
Ta bai bini un legislashon nobo pa nabegashon ku ta bisa ku tur barku di rekreashon den awanan di Aruba mester tin un ekipo di seguridat i un radio. Miembro di Staten Chris Dammers, presidente di e Komishon Parlamentario Permanente di Transpòrt awe meinta a anunsiá ku pronto lo bini un reunion di urgensha ku minister di Transpòrt pa ‘evita e tipo di insidentenan aki’.
Outor Ariën Rasmijn