Kalian Sams ganado Homerun Derby – potrèt: Deya Mensche
WILLEMSTAD – Baseball Week a finalisá ku un Homerun Derby yená ku suspenso. E faborito lokal i ‘Homerun King’ di Hapon, Wladimir ‘Coco’ Balentien a enfrentá e estrea hulandes Kalian Sams i Jonathan Schoop di Baltimore Orioles. Finalmente Kalian Sams, un tras di otro, a dal dos bala fo’i Tio Daou Ballpark, kual a sigurá su viktoria. E biaha akí si Coco Balentien a duná su fanatikadonan un desplego di forsa memorabel. “Dos aña pasa mi no a hasí nada, pero e aña akí si mi ta bin hasí algu”, Balentien deklará anteriormente.
Siguridat tabata estrikto na Tio Daou Ballpark, i tabatin ‘bouncer’ i varios otro aktividat pa entretené mucha. Notabel ta ku a tribunanan general a yená lihé, pero e sekshon di VIP si tabata mas trankil. Pa esaki no keda bashí, organisashon a haña nan ta partí karchi pa e sekshon akí yena un tiki.
Selekshon
E delaster dia di Baseball Week a kuminsá trankilo, ku un wega amistoso entre e selekshon lokal i e peloteronan profeshonal, kual a resulta den un ‘no hit, no run’ kontra e selekshon. “Tabata poko dramátiko pa nos, pero nos a siña hopi di e eksperensia. Otro biaha nos no lo permití nan slòns nos a asina”, e hóbennan a garantisá.
Selekshon lokal – potrèt: Deya Mensche
Despues tabatin un ‘meet & greet’ entre e peloteronan i e públiko. Ku pasenshi e chikitinnan a para den rei ku nan mayornan pa haña un firma di nan pelotero favorito riba e tantísimo pèchi, tishùrt i bala ku mayornan por a kumpra. E peloteronan a sinta na rei pa kumpli ku e petishonnan i asta Andrew Jones a hasí akto di presensia, pero no a hungá den e wega amistoso ni por a keda durante e Homerun Derby. “Mi tei pa e muchanan”, Jones a splika. “Ta un plaser pa duna bèk na esnan mas chikí ku di berdat ta stima e wega.”
E muchanan sigur a gosa di nan enkuentro ku e peloteronan. Durante un kòmbersashon ku Ret Karibense, nan a ekspresá nan satisfakshon pa ku e siman. “Mi ke puntra Andrelton Simmons i Didi Gregorius kon nan a hasí pa yega Liganan Grandi”, un hóbennan a splika.” Nos a siña kon pa kore mas duru, picha mas fuerte i wak e target nan mas mihó”, nan a añadi.
Pelotero profeshonal konosiendo nan fanatikadonan chiki – potrèt: Deya Mensche
Notabel tabata e ousensia di Jair Jurrjens, embahador di Blue Bay i un di e inisiadó di Baseball Week, ku pa motibunan personal no por a asistí, pero si tabata presente na e reda di prensa ku a tuma lugá den siman.
Den e ‘dugout’, organisashon di Blue Bay a gradisí tur hungadó pa nan aporte i a kompartí ku aproksimadamente 52 mil doler a keda rekoudá durante e fundraising pa fundashon, i ku pa yanüari 2016 na lo por duna un relato mas ekstenso na kon e sèn a keda ubika.
Vürwèrk
Durante e apertura Kris Berry i Jean Jacques Rojer a presenta un bunita vershon akústiko di nos himno pa despues Excel Dance Academy duna un show time kolorido. Despues di e Homerun Derby, tabatin un show kolorido di vürwèrk, pa despues ERA sera e anochi ku un tremendo presentashon.
Outor Deya Mensche
Didi Gregorius, Diegomar Markwell, Coco Balentien – potrèt: Deya Mensche