E opstákulonan di e lokashon na Brievengat ta falta di awa pa paga kandela na e sitio, e seguridat limitá i un tranké ku no ta sera bon – potrèt: Elisa Koek
WILLEMSTAD – E eksploshon na krùithùis na Seru Lora a sosodé kasi tres aña pasá i por lo pronto no ta mustra manera lo bini un sitio fiho nobo. Na 2013 a kuminsá usa e sitio temporario na Brievengat i ta manera esaki lo keda asina. Pero seguridat sí no tin niun kaminda.
“Bon mirá no ta un krùithùis”, James Wilson di e departamento di prevenshon di brantwer ta bisa. “Pero ya pa añanan largu tur kos ta bai bon ke men nos tin konfiansa.” Brantwer ta konsehá tokante e sitio, pero e responsabilidat di krùithùis ta serka Dienst Openbare Werken (DOW). Pakiko esaki t’asina, no ta kla. Wilson no ker a kontestá esaki i DOW no tabata alkansabel pa komentario.
Promé eskoho
Despues di e eksploshon tres aña pasá, kaminda tabatin kuater morto i diferente hende a sufri herida serio, mester a bini un sitio lihé pa warda vürwèrk. Brantwer tabata traha riba esaki kaba promé ku e eksploshon. “E sitio na Brievengat no tabata nos promé eskoho pa un krùithùis nobo”, Edmiro Anita, èks Hefe di Prevenshon na brantwer ta bisa. “Pero despues di e eksploshon na Seru Loraweg mester a bini un sitio nobo lihé i minister a skohe esaki.”
E opstákulonan ta falta di awa pa paga kandela na e sitio, e seguridat limitá i un tranké ku no ta sera. Si tin awa pa paga kandela mes ta difísil pa mira djafó: pafó di e containernan no tin nada i, si e awa no ta den e containernan, no tin solushon pa e awa. Tampoko no tin seguridat na e krùithùis i hende sin pèrmit ta drenta sali sin problema i yega na e containernan. E hendenan ku ta pasa bai bini a pusha e tranké manda abou.
Segun Wilson, ku aktualmente a enkargá hopi tarea di Anita, ta responsabilidat di DOW pa pèrkurá pa e luga ta seif. “Nos a duna un konseho manera nos ta hasi tur aña. Na final ta DOW mester kumpli ku e konseho.”Pa laga e lugá keda apsolutamente seif, banda di e kosnan ku a menshoná kaba mester usa material ku no por pega kandela fásil. “Akaso bini un kimamentu chikí, e kandela no ta bula bai e otro containernan fasil. Ademas mester tin ventilashon den e containernan pa asina airu fresku por drenta e containernan.”
Kos ku ta sende kandela
E mas importante segun Wilson ta ku nunka nunka algu ku ta sende kandela no por yega serka. Esaki por ta un sigaria sendé. “Tur hende ku trata ku vürwèrk no mester huma den serkania. Esaki ta i ta keda peligroso. E riesgo ku esnan ku no tin outorisashon lo keda hasi esaki, ta keda miéntras tantu ku tur hende por yega fásil serka di e containernan, pero tòg Wilson ta pensa ku nan lo bini kla. “DOW tin algun kos di hasi ainda, pero e sitio riba su mes ta seif kaba. Si algu bai malu, loke nos no ta ferwagt, awor e krùithùis ta na un distansha seif di e habitantenan.”
Outor Elisa Koek