Tirso Virginie ta nenga di paga komo heredero di e esklabonan librá di Malpais |Potrèt: Dick Drayer
WILLEMSTAD- Habitantenan di Gato ta hartá di e konflikto i e inklaridatnan tokante e tereno di propiedat den nan bario. Diferente famia ta kleim e propiedat di e plantashon anterior Gato.
Un di e famianan, famia Pietersz, ta manda resibu pa kobra hür. Ademas e famia a pone bòrchi den e bario. Riba e bòrchinan tin pará ku ta nan ta manehá e terenonan di Gato i niun otro hende.
E disputa rònt di e propiedat di Gato ta kore for di añanan ’70. Tantu famianan Ferero, Navarro i Pieters ta kleim di ta doño. Ferero i Navaro huntu ta aktua komo e herederonan di e diestres esklabonan librá di Rasveldt. Pietersz ta bisa ku el a bira doño di Gato pa motibu di kadukashon. Pais Kòrsou tambe tin wowo riba e tereno. Si no por determiná ken ta doño henter e área ta kai den man di gobièrnu.
Komishon Paula
Fin di añanan ’90 e konflikto entre Eilandgebied i e diferente famianan a bira asina grandi ku gobièrnu a duna un komishon bou di direkshon di profesor dr. Alejandro Yandi Paula òrdu pa investigá si por determiná ta ken ta doño opservando historia, anto kon ta bai hasi esaki.
E rapòrt ta asina desfaborabel pa gobièrnu ku diputado Anthony Godett ta bisa ku e ta bai laga komprobá e rapòrt hurídikamente i profundamente na Hulanda. Pero e rapòrt ta disparse den lachi di e edifisio di gobièrnu, e ta pèrdè i e no ta bira públiko nunka.
Tòg por lesa e rapòrt aki via Ret Karibense. E komishon ta konkluí ku no por ta posibel ku ta trata di herensia no manehá. Ke men e kleim di gobièrnu riba Gato no ta legal. Tambe e ta bisa ku e situashon no masha kla tokante e tereno di Gato ta debí na negligensha ekstremo di gobièrnu, pasobra su atministrashon ta bruá.
Kasonan den korte
Gerardus Lazaro Ferero ta desendiente di e esklabo Leentje, un di e diestres esklabonan librá ku a heredá e plantashon Malpais ku Gato. E ta hür tereno na Gato i e tin Benicio ‘Fil’ Pietersz ta traha p é i ku ta kobra hür p’é. Despues ku a midi e tereno na 1974 na petishon di Ferero, e kos ta bai malu entre nan dos. Fil ta bisa ku entretantu e tereno a bira su propiedat, ta e ta kobra e hür porfin. Ku famia Ferero tin añanan largu ta paga e impuesto pa e tereno segun Pietersz no ta relevante. Ta sigui un kantidat grandi di kaso den korte. Te den apelashon.
Bòrchi di atvertensia ku famia Pietersz a pone den e bario di Gato
Malpais
E plantashon Malpais ku Sybrecht van Uytrecht na 1809 a muri bai laga ta mas grandi ku Gato so. Na e banda sùit di e kaminda pa Westpunt tin Wechi, ku sa yama Malpais Chikí tambe. Banda di dje tin Malpais Grandi ku Rustplaats. Segun e karta di ehekushon di e tèstamènt e terenonan ei tambe ta kai bou di e herensia .Banda di dje ta haña Malpais grandi ku Rustplaats. Segun e karta di ehekushon di e tèstamènt e terenonan ei tambe ta pertenesé na e herensia ku no a parti di Sybrecht van Uytrecht.
Státùs di propiedat
“Meskos ku Gato un investigashon históriko mester trese klaridat tokante e státus di propiedat pa henter e tereno”, Norwin Ferero ta konkluí. “E hòrtamentu di tereno kometé pa gobièrnu i FKP kende a konstruí infrastruktura einan, mester para. E tereno ta pertenesé na e herensia di e diestres esklabonan librá di Sybrecht van Uytrecht. Na aña 2015 ainda Kòrsou no ta respetá su propio pasado di sklabitut.”
Outor Dick Drayer