Fin di aña paki i karta ta inundá C-Post – potrèt Leoni Leidel-Schenk
WILLEMSTAD – “Mi ta warda un promedio di dos luna riba un paki ku ta bini djafó, esta si e yega”, un hòmber ku ta wardando sin pasenshi na e pòstkantor prinsipal na Groot Kwartier. “Aña pasá un paki di Pasku ku nan a manda na novèmber a yega te na mei.” Tin hopi hende den e pòstkantor ku ta tur dòrna ku adorno di Pasku. No ta fin di aña so tin reklamo tokante partimentu di pòst.
E presentenan ta kompartí relato di konvokashon di morto ku a pèrdè i karta sertifiká importante ku ta keda den pòstkantor simannan largu. “Karta hopi bia no ta yega. Loke mi kumpra riba Ebay ta disparsé ma mi ta haña pòst ku mester a bai pa otro hende si. Ta un desaster!”, un dama frustrá ta bisa e trahadó di pòst tras di e bentana. Pa Mariette Hanssen e problema ta mas grandi: for di dia ku el a bin biba Kòrsou nunka e no a haña pòst.
Belastingdienst
“Na Aqualectra i Flow mi a laga pone mi resibunan online. Mi no ta haña pòst for di eksterior tampoko”, Hanssen ta bisa. “M’a haña mi ku masha problema ku belastingdienst di Hulanda pasobra mi pòst no ta yega aki. Hopi bia mi ta lat pa skibi opheshon.” Na C-Post e ta bisa ku nan no ta reakshoná. “No ta bini un solushon. Mi a kologá un bòrchi na kabamentu di e kaya pa e partidó di karta, pero lástimamente te ainda sin.
Franklin Sluis, direktor di C-Post International ta bisa ku e ta rekonosé e problemanan pero ku tin hopi faktor ku ta hunga un papel. “Si no manda paki òf karta sertifiká, pa nos ta masha difísil pa sa unda e ta. Un pakete for di Hulanda ta pasa via e kaminda di mas barata, por ehèmpel via Inglatera òf Merka., asina pòst ta traha. For di 10-10-’10 ta sosodé regularmente ku pòst ta yega na un di e otro islanan anto e mester bai Kòrsou ainda. Banda di esaki tur pòst mester pasa duana, kaminda sa tin falta di personal. Tur esakinan por pone ku tin retraso.”
Bario sin struktura
C-Post tambe tin falta di personal Sluis ta bisa, i e partimentu di karta lokal tambe ta sufri. “Barionan manera Wishi, Marchena i Bándabou ta barionan sin struktura. Partido di karta mester konosé e bario masha bon. Si un di e partidonan di karta aki bira malu òf bai ku fakansi, tin un problema.” Pa no warda te ora e barionan aki haña struktura, C-Post na yanüari a start e proyekto di pilot C-Box, ‘Community Mailbox’. Habitantenan di Groot Kwartier, Emmastad i Biesheuvel mester buska nan pòst nan mes na e C-Box. “Hende mester kustumá, pero esaki si lo pone e partimentu di pòst bai mas suave.”Kasonan spesífiko manera di Hanssen, Sluis ke atendé e mes.
E hendenan den e sala di espera tin nan propio teorianan tokante e desaparishon di e paketenan. “Ta hòrta ta hòrta nan. Henter e pakete òf algun kos di den e pakete.”, un hòmber ta bisa èkstra duru. Thyra Sannen tin dos luna ta warda su paki. “Ta dos kadena di plata i mi ta puntra mi mes si nan por mira esaki ku un scanner. E balor no ta grandi, pero tòg ta piká si hòrt’é.”
Kámara
Segun Sluis tin kámara digital na pòstkantoor i si saka algu for di un paki por mira esaki. “Kòrda si ku e paki ta pasa via hopi kanal i e kos por a bai malu kaba promé ku e paki yega serka nos.” Si esaki sosodé ta kita e persona for di trabou. “Pero”, e ta bisa aserka, “den e shete añanan ku mi ta direktor esaki no a sosodé niun bia.
Outor Leoni Leidel-Schenk