Dr. Wouter Veenendaal ta investigá e situashon polítiko den e partinan karibense di Reino – potrèt: John Samson
LEIDEN – Si tabata posibel un kuart di Bonerianonan lo a preferá di bai bèk na e situashon di Antia hulandes. Koninklijk Instituut voor Taal-, Land- en Volkenkunde (KITLV) awe ta bini ku sifra nobo tokante e situashon polítiko na Boneiru.
Na sèptèmber i òktober 407 di 600 habitante selektá arbitrariamente a indiká ki státùs polítiko nan ta deseá na e momento aki pa Boneiru. 40 porshento di nan ta preferá e státùs di munisipio. Esaki ta algu mas ku e 35 porshento ku a vota pro e státùs aktual den e referèndem.
For di e investigashon a sali ku tin hopi desunion bou di e oponentenan di státùs di munisipio ora puntra nan kua státùs Boneiru sí lo mester tin segun nan. Kasi un kuart di esnan ku a puntra lo preferá mira Boneiru drenta Antia hulandes bèk, miéntras ku e státùs di pais outónomo den Reino, manera Kòrsou, por konta ku sosten di solamente 20 porshento. Un porsentahe masha chikí (2.6 porshento) ke pa Boneiru bira kompletamente independiente.
Aki 25 aña
E investigadónan a puntra e partisipantenan tambe kon nan ke mira Boneiru aki 25 aña. E ora ei e sosten pa munisipio ekstraordinario ta bira ménos: alrededor di un kuart di esnan ku a puntra lo ke pa Boneiru tin e státùs aki ainda aki 25 aña. E sosten pa un independensia kompletu ta krese (10 porshento) i e státùs di pais outónomo (22 porshento) ta krese u tiki. Pero kasi un kuart ta bisa ku nan no sa ki status Boneiru lo mester tin aki 25 aña.
Outor John Samson