Partera Amanda Adriaansen, Kinberly Concincion, asistente di parteranan i Stella Adamus, hefe di kuido na Fundashon Duna Lus – potrèt: Deya Mensche
WILLEMSTAD – Pa di tres aña konsekutivo, Fundashon Duna Lus tin e kampaña unda ta parti e konosido paketenan di Pasku ‘Di Mama pa Mama’ na mamanan ku ta duna lus durante e siman di fin di aña. Na total a parti trinta pakete, pero e reakshon tabata asina positivo ku ainda a sobra mas material i komestibel. Según Stella Adamus, hefe di kuido na Fundashon Duna Lus, e inisiativa ta bini di henter e departamentu na Kraamkliniek, mirando ku durante di e konsultanan ku e mamanan, e parteranan ta observa e nesesidat bou di komunidat i a disidí di tuma akshon.
Kraamkliniek tin hopi aña operashonal na Kòrsou, pero antes e tabata un fasilidat i e parteranan tabata traha independientemente. Awó tin seis partera operashonal, pero tres partera ta den servisio permanente i tres ainda ta traha independiente. “Paso nos ta traha den servisio nos ta mira un gran segmento di e komunidat”, Annemieke Plugge, koordinadó di partera, a splika.
Deya Mensche den kombersashon ku Stella Adamus i Kinberly Concincion
Si partera Plugge ta hopi impreshoná ku e reakshon i sosten di komunidat. “Nos a haña donashon di tur kaminda, di donashon priva lokal i fo’i Hulanda, muchanan di skol, kompanianan manera SVB ku a yuda kolekshoná, i asta supermerkadonan”, e partera splika. Fundashon Duna Lus a hasi un petishon riba Facebook i dia 10 di Desèmber nan a kuminsá kolekshoná.
“E forsa sosial di e komunidat ta algu hopi impreshonante”, Plugge a sigui splika. Den e añanan anterior Kraamkliniek a hasí un akshon similar, pero riba un eskala mas chikitu. E aña akí e reakshon tabata asina grandi ku a sobra hopi komestibel ku asta e fundashon ta konsiderando pa kontinuá ku e paketenan henter aña, pero riba un manera mas básiko.
E realidat difísil
“Na Kraamkliniek e kliente ta haña kuido prenatal, pero tambe tin e tim post natal, i e zùsternan di bario ta hasi bishitá na kas i asina ta mira kon e situashon real ta”, Adamus a splika. E parteranan ta rekonosé ku e hende mester kambia algu struktural den su bida pa su situashon ekonómiko i sosial por mehorá. “Nan ta den e situashon akí paso hopi biaha nan no tin akseso na e ayudo”, Plugge a konstatá. Según Plugge, antes tabatin retonan pa yega na kuido nesesario paso tabatin hende ku diferente klase di seguro, pero awó esei tambe a kambia.
Plugge ta konstatá ku ainda tin un grupo grandi di yu di Kòrsou ku tin SVB, pero tòg e akseso na kuido ta bai difísil paso nan ta biba bou di sirkunstansianan desafiante. Tin relatonan alarmante ku tin muhénan ku mester kue bus of asta kana oranan largu pa yega nan konsulta. “Mayoria di mama ta bin kontrolá nechi, pero sa pasa ku pa motibu di sirkunstansianan di bida nan ta bini na ultimo momentu”, Plugge a splika.
E enfoke di Fundashon Duna Lus, na promé lugá, ta riba kuido di mama i yu. “Nos ta hasi pregunta básiko, manera ken e tata ta, kuantu aña e tin i ki profeshon e ta ehersé, pero nos enfoke no ta pa hungá trahadó sosial”, Plugge a bisa. Durante e konsulta ta kontrolá tur kos, ta kue sanger i ta hasi un ecografía.
Yu di Pasku
Según Kinberly Concinsion, kende ta e promé punto di kontakto komo e asistente di parteranan ora e mamanan bin kontrolá, hopi hende ta preferá di bin buska nan pakete na Kraamkliniek mes. E paketenan ta bon surti, “nos a hinka pampers, baby wipes i komestibel aden”, Concinsion a splika. Manera tur aña Kraamkliniek tambe tin un pakete spesial pa e yu di Pasku, i e promé beibi di aña tambe ta haña su atenshon.
Outor Deya Mensche