Randal Corsen ke un konservatorio na Kòrsou | Potrèt: Dick Drayer
WILLEMSTAD – Kòrsou mester di un konservatorio. Esaki ta opinion di Randal Corsen, pianista, kompositor i èks dosente na tres konservatorio na Hulanda.
E chèns ku su deseo lo sali na 2016 ta grandi. E plannan di Universidat di Kòrsou pa kuminsá ku un Bachelor di Muzik òf un Bachelor di Enseñansa di Muzik ta ta hopi avansá.
Segun Corsen tin un kantidat masha grandi di dosente di muzik na Kòrsou di edat hopi avansá . Su mes dosente di muzik tempu ku e tabata bai enseñansa básiko, señora Croes, ta serka di hasi 90 aña i ainda e ta duna lès. “Un dama masha ekstraordinario, pero nos mester di hende nobo.” Corsen a bai Hulanda na 1990 pa studia piano na Konservatorio di Tilburg. Na 1995 el a gradua cum laude i despues el a bai traha na konservatorio di Amsterdam i Utrecht.
Disiplina
“Aktualmente ta tira studiantenan kurasoleño di muzik den hundu. Nan ta bai Hulanda mal prepará i despues nan ta kita. Hopi bia e kousa ta disiplina”, Corsen ta bisa. “Nos tin un kantidat di talento masha grandi. Espesialmente den ritmo nan ta hopi bon, pero harmónikamente i melódikamente nos ta kana hopi atras. Nèt esei ta e fishinan ku bo mester traha mas duru pa nan.”
Un bon konservatorio na Kòrsou segun Corsen por sòru pa hende no kita pa motibu di e diferensha den kultura. “Si e studiantenan ei na nan turno bai duna lès na skol di muzik òf den enseñansa regular, por traha mesora na e disiplina di e talentonan nobo. Mas haltu e nivel ei, mas tantu talento lo sigui kore.
Esena di muzik
Un konservatorio por ta un stimulashon masha grandi tambe pa e diferente podionan di muzik na Kòrsou, Corsen ta pensa. “No lubidá ku músiko mester sobreviví na Kòrsou. Nan ta haña nan fòrsá di traha komersialmente. Esei ta daña e kalidat kultural.” Un konservatorio por evitá esaki. “Nos ta orguyoso di nos kultura. Nos ta papia di nos kompositornan bieu, nos artistanan musikal. Kòrda ku esaki disparsé, nos lo pèrdè un parti grandi di nos identidat.””
Outor Dick Drayer