Lider di e delegashon Jeroen Recourt
PHILIPSBURG – Na Sint Maarten e areglo di disputa pa reino djaweps a kousa poko kontroversia durante e deliberashonnan interparlamentario di reino (IPKO). E tres paisnan karibense – Aruba, Sint Maarten i Kòrsou – ke aselerá e proseso i entregá un ‘Lei di Inisiativa di Reino’, pero e delegashon hulandes ta haña esaki prematuro.
No opstante e diferensha di punto di bista e ambiente durante IPKO a keda kordial. René Herdé (Aruba) asta a remarká ku e delegashonnan probablemente e mesun anochi ei ’lo bai bebe zjampaña’.
Unidat
E lider di e delegashon hulandes Jeroen Recourt ta enfatisá ku unidat ta e punto fuerte di IPKO i ku e ta e instrumento pa pone preshon riba gobièrnu. “Si e tres paisnan karibense bini ku nan propio proposishonnan, e unidat ei ta kai afó”, segun Recourt.
E delegashon hulandes ta haña ku ta gobièrnu di reino ta na turno. “Nos ta desapuntá ku loke a logra te awe”, Recourt ta bisa. “Na òktober ainda nos a entregá un moshon ku ta enfatisá ku e areglo di disputa ta nesesario. Nos ke oumentá preshon riba gobièrnu i pidi minister un proposishon konkreto. Despues nos lo bai den debate.
Karnisero
Alex Rosaria (Kòrsou) ta esun mas eksplísito den su oposishon kontra e punto di bista hulandes. “Esaki a dura muchu largu kaba. Nos ta seis aña mas leu i e úniko idea ku algun kolega ta bini kuné ta pa oumentá preshon riba gobièrnu. Seis aña largu nos no a mira niun moveshon. Hulanda ta e karnisero ku ta keda kùr su mes karni i esei no ta bon pa demokrasia.
Si e partidonan lo reuní ainda lo resultá djabièrnè den e deklarashon final.
Outor Hilbert Haar