Potrèt: Ret Karibense
KRALENDIJK – Boneiru su pagadónan di belasten por paga nan belasten kèsh atrobe na Belastingdienst Caribisch Nederland (BCN). Por hasi esaki na Girobank, ku grátis ta ehekutá tur transakshon riba kuenta di servisio di belasten.
Anteriormente BCN a sera e kaha. E ora ei siudadanonan mester a paga elektrónikamente òf kèsh na banko. Bònt di konsumidó Unkobon e ora ei a entregá un keho na Defensor di Pueblo Nashonal pasobra despues ku a sera e kaha hopi habitante a haña nan ta bai banko, ku sí tabata risibí e plaka na kèsh, pero tabata kobra gastu pa pasa e plaka pa servisio di belasten.
Defensor di Pueblo Nashonal a haña ku ku esaki BCN no a tene kuenta sufisientemente ku hende ku un entrada abou i/òf sin kuenta na banko, i a atvertí servisio di belasten riba esaki.
Bou di pagamentu di belasten ta kai tambe pagonan na Ministerio Públiko, Kuerpo Públiko Boneiru i Voogdijraad.
Outor Pieter Hofmann