E foro tabata bon bishitá djárason anochi – potrèt: Hazel Durand

E foro tabata bon bishitá djárason anochi – potrèt: Hazel Durand

THE BOTTOM – Saba ke ménos fondo designá i mas fondo liber, kaminda nan ta haña e fleksibilidat pa den ministerio aloká fondo na Saba su nesesidatnan berdadero.

Pa kuminsá den aña nobo eilandsraad a organisá un foro públiko djárason anochi, pa deliberá tokante e punto di bista di e rapòrt di evaluashon resien di sinku aña despues di 10-10-’10.

Pobresa
Pobresa i kosto di bida mester tin prioridat number un pa e añanan binidero, eilandsraad ta haña. Den e último sinku añanan por a mira hopi mehorashon segun e konseho, pero e rapòrt di evaluashon a konkluí tambe ku pobresa a oumentá i kosto di bida a subi.

Diputado i lider di e delegashon Chris Johnson ta bisa: “Mester pone ‘target’ pa altura di AOV, suèldo mínimo, ònderstant i otro kompensashon. Mester tradusí den sifra e nivel di previshon aseptabel pa Hulanda i e márgen di pobresa.

Na 2013 Bestuurscollege huntu ku doñonan di trabou a palabrá pa subi suèldu mínimo ku 20 porshento. Ministerio di Asuntunan Sosial a ninga di adaptá e oumento. Te awe a alkansá un oumento di 13.5 porshento, pero esaki segun Bestuurscollege no ta sufisiente. Eilandsraad ta sugerí un oumento mas aleu di suèldu mínimo i e pagonan ku ta liá na suèldu mínimo.

Banda di esaki tin un skarsedat na bibienda sosial. Konstrukshon ta masha karu na Saba, ku konsekuensha ku mester supsidiá bibienda sosial hopi. P’esei eilandsraad ke invertí den mas bibienda sosial. Johnson ta bisa ku ora evaluá e nivel di previshonnan na Saba, gobièrnu hulandes mester tene kuenta ku e falta di instanshanan sosial ku sabanonan por hasi uso di dje. Riba e isla no tin un kas di akohida pa muhé ku nan partner a maltratá nan, no tin un sentro di revalidashon òf un lugá adekuá pa detenshon.

Invertí
Johnson ta bisa ku aktualmente mayoria di e fondonan di BES ta usa pa prioridatnan ku gobièrnu hulandes ta pone, sin masha deliberashon ku e islanan. Ounke algun invershon segun e a yega na mehorashonnan, esaki no ta e kaso serka e Wet VROM BES i Bouwbesluit BES. “E prosesonan aki tabata fèrfelu i a tuma hopi trabou.”

Hopi fondo ta bira aksesibel via pagonan ekstraordinario pa e islanan, manera e medionan integral, e fondonan di naturalesa, fondo pa desaroyo ekonómiko, agrikultura, maneho di desaster, violensia doméstiko i pa derecho di mucha. Pa manehá e fondonan aki bon, segun eilandsraad mester di invershon den gobièrnu lokal i finansiamentu struktural pa kubri gastunan operashonal manera mantenshon i personal èkstra.

Tweede Kamer
Eilandsraad ta di akuerdo ku e komishon di evaluashon ku e kuadro atministrativo a lanta despues di 10-10-’10 tin hopi defekto. Djabièrnè diesun representante di Eerste i Tweede Kamer ta na Saba pa e Kumbre Hulandes Karibense, kaminda huntu ku diputado di Boneiru, Sint Eustatius i Saba nan lo kombersá tokante sinku aña di integrashon den e sistema gubernamental hulandes. E miembronan di Kamer djasabra ta tene un ‘meet and greet’ ku komunidat na Saba.

Outor Hazel Durand