Mucha sin pèrmit di estadia tin bia añanan largu ta keda sin haña enseñansa – potrèt: Elisa Koek
WILLEMSTAD – “Mi a purba tur kos, pero niun hende no ke firma pa mi yu muhé i ami”, e djamaikina Annet Riley di Jamaica ta konta. Último añanan e tabata keda na Kòrsou de bes en kuando, pero e no ta haña un pèrmit di estadia. Su yu muhé ku a nase na Kòrsou tampoko no ta haña státùs legal. Pasobra su tata no ta rekonos’é.
Hopi yu di migrante ta kai den un bashí. Tin di nan ta nase na Kòrsou òf ta biba ei añanan largu pero nan ta ilegal. P’esei hopi bia nan no por bai skol i nan ta falta enseñansa i formashon.
Riley su yu muhé entretantu ta biba na Jamaica. Pasobra e no por a haña pèrmit di estadia el a muda bai pais di su mama. Pero Riley a sigui lucha i a keda bai Kòrsou bèk den speransa di por traha un bida p’e i su famia. “Mi tabata spera ku un hende por a firma pa mi i mi a purba tur kos. Awor si mi ta stòp.”
Riley su sirkunstanshanan no a yuda tampoko: último dos aña el a biba den stupi di un kas. E tabata baña ku slan di muha mata i tin be e por a usa e baño. “No tabata fásil, pero mi ta un luchadó, mi no ta pèrdè kurashi lihé. Si bo ke lanta un eksistensha nobo bo mester bai p’e, pero e no tabata pa mi. Mi yu muhé mester di mi.”
Tiki derecho
Tin hopi muhé mas manera Riley: nan ta spera di haña un futuro mas mihó i na Kòrsou nan ta forma un bida. E yunan ku bini for di e bida aki lástimamente tin tiki derecho. “Nan no ti derecho riba enseñansa ni seguro médiko”, Agnes Cobelens ku hopi bia ta yuda famianan asina ta bisa. “Tin be e mama tin un pèrmit si pero sin derechi riba reunifikashon di famia. E ora ei e muchanan ta keda na Kòrsou ilegalmente òf nan ta bai e pais di nan mama ku nan no konosé i nan keda sin mira nan mama añanan largu.
Sin diploma pues sin enseñansa
Direktor di Prins Bernhardschool Bentley Leonora ta bon na altura di e problema aki. El a topa mama ku tin dies aña sin mira nan yu, pasobra e mucha no tabatin státùs legal. “Esei no ta bon i ta kontra leinan di naturalesa.” Si e mucha bini Kòrsou mes, e ta keda hopi aña sin sigui enseñansa, pasobra mayoria di skolnan ta ninga mucha sin papel. Finalmente un hende sin pèrmit di estadia no por haña diploma tampoko. “Hopi skol tin miedu”, Leonora ta konta. “Pero si alafin un mucha haña su papelnan tòg miéntras ku nunka e no a bai skol e ora ei sí tin un problema. Ta p’esei nos no ta puntra pa papel òf idioma, bon mirá nos tur ta migrante porfin.”
Na Prins Berhardschool mas o ménos mitar di e muchanan ta migrante. Último tempu tin mas mucha benesolano pa motibu di e krísis den e pais ei. Enkambio kos ta mihó na Colombia i ta ripará esaki mesora den e klasnan.
Perspektiva pa futuro
E echo ku e muchanan no ta papia ni papiamentu ni hulandes segun Leonora no ta problema: den kuminsamentu mester papia ‘ku man ku pia’ manera ta bisa, pero di mes nan ta bin papia. “Entre nan tin poko mucha masha sabi i yen di talento i nan ta meresé un chèns. Òf mihó bisá: bo ta evitá problema pasobra bo ta eduká nan Mucha òf hóben sin perspektiva por bira un molèster pa henter komunidat.”
Outor Elisa Koek