Kontaminashon na Playa Canoa – potrèt: José Manuel Dias
WILLEMSTAD – No opstante e echo ku ta for di 2007 ku e departamentu di Obranan Públiko (DOW) a traha riba un plan di akshon pa atendé ku e awanan residual di Parke Industrial Brievengat, ketu bai e awanan aki ta bai resultá den laman na Playa Canoa. E awanan aki ta kontené fekalia i tambe kímikonan prosedente di vários fábrika i ta kontaminando e medioambiente na Playa Canoa.
Segun e piskadónan di Playa Canoa e problema di kontaminashon ta data for di dékada 80 na momentu ku a habri Parke Industrial Brievengat. Entretantu e situashon a sigui empeorá i awor no solamente e laman ta kontaminá pero tambe e bahia konosí komo Santu Pretu ku ta keda djis pabou di Playa Canoa. “Si bo sambuyá akinan bo ta ripará ku no tin koral mas, e ta un área kaminda tur kos a muri bou di awa”, asina piskadó Kenneth Webster ta deskribí e situashon na Playa Canoa.
Un reportahe di José Manuel Dias:
Segun e plan di akshon ‘Rioolaansluiting Industriepark Brievengat’ di 2007, Curinde ku ta e instansha ku ta manehá Parke Industrial Brievengat, lo mester a hasi un análisis di tur e komponentenan kímiko ku tin den e awanan industrial. A base di e resultadonan Curinde konhuntamente ku DOW lo mester a invertí den un planta adekuá pa prosesá awa ku kímikonan pa despues konektá esaki riba e ret di riolering di DOW.
Sin splikashon
E plan aki sinembargo no a bira realidat i te awe no tin un planta pa prosesá e awanan ku ta sali for di e Parke Industrial Brievengat. Konsekuensia ta ku tur e awanan ku kímiko den dje ta bai resultá na Playa Canoa. Direktora di Curinde Jacqueline Jansen ta preferá di no komentá riba e plan aki miéntras ku direktor interino di DOW Irvin Bata no por a duna un splikashon pa e frakaso di e plan. “Mi no por bisa ta kiko ta e motibu ku e plan a wanta”, asina Bata a bisa.
Responsabilidat
Remarkabel ta ku ta eksistí un konfushon ta ken ta e instanshanan responsabel pa e kontaminashon di Playa Canoa. Di akuerdo ku Curinde e awanan industrial ku ta sali for di Parke Industrial Brievengat ta drenta den e sistema di riolering di DOW. “Si e awanan aki ta bai resultá na Playa Canoa anto ta DOW tin ku responsabilisá su mes pa esaki”, asina Giovanni Boekhoudt gerente di kliente di Curinde a bisa. Di su banda Irvin Bata di DOW ta desmentí esaki. “Nan no ta konektá riba e riolering sentral i mas bien ta los pa bai laman” Bata a reakshoná.
Un di e fabrikanan den Parke Industrial Brievengat ku ta traha ku hopi kimiko ta Antillean Soap Company. Segun e hefe di e departamentu tekniko Tom Stegeman tur nan awanan residual ta bai den e sistema di afvur di Curinde. “Lokual ta sosodé ku e afvur pafó di e tereno di e parke industrial mi no ta na altura di dje”.
Den kuadro di tratadonan vigente i protekshon di nos medio ambiente for di aña 1997 no ta permití pa los na Playa Canoa. E úniko sitio ku por los ainda ta e laman na Shut pero pronto esaki tambe lo keda prohibí . DOW ta trahando riba un sistema na Seru Fortuna i Seru Lora ku lo akapará e awa ku e trùknan ta los.
Outor José Manuel Dias