Mbo no konosé un momento fiho pa tene èksamen, sino por eksaminá henter aña – potrèt: Janita Monna
KRALENDIJK – Mbo di Scholengemeenschap Bonaire por lo pronto no por eksaminá mas. E medida ta sigui un karta di Inspekshon di Enseñansa.
Segun inspekshon e ofisina di èksamen di enseñansa sekundario profeshonal ta funshoná insufisientemente. Pesei no por garantisá ku e èksamennan ta kana korektamente. Skol a informá e studiantenan di mbo djabièrnè meinta. Nan lo sufri tardansa, awor ku e skol no por eksaminá.
Nivel
E medidanan ta balido tantu pa e èksamennan teorétiko komo esnan práktiko. Mbo no konosé un momento fiho di eksaminá pero ta eksaminá den kurso di aña. Inspekshon a establesé anteriormente kaba ku e eksaminashon di estudionan di mbo na SGB no tabata korespondé na e kalidat básiko. Apesar di tur palabrashon i plan di mehorashon te awe e skol no a logra di trese esaki na e nivel eksihí.
E medida no ta toka studiantenan di mbo so. Hóbennan ku ta sigui un edukashon di mbo1 serka Forma, e instituto pa edukashon di adulto, tambe ta víktima. Nèt e temporada aki e skol tabata tene èksamen. E fecha di diplomashon tabata planeá kaba.
Ingrid Berben, direktor di Forma: “E kontratempu aki ta duru pa nos studiantenan dil kuné. Ta un grupo vulnerabel, ta hóbennan ku tin hopi eksperensha di fayo den nan bida kaba. Un éksito manera hañamentu di un diploma ta esensial pa nan.”
E edukashonnan di mbo 1 na Forma for di 2013 tabata kumpli ku e kalidat básiko. Esei a hasi e sla duru, pa e personal tambe. Berben ke hasi tur loke ta posibel pa pèrkurá hasi un eksepshon pa e 21 kandidatonan di èksamen di Forma.
Responsabilidat
Scholengemeenschap Bonaire ta tuma responsabilidat kompleto pa e situashon ku a surgi i ta bisa ku nan ta den kombersashon ku inspekshon.
Outor Janita Monna