Direktor general Lydia Emerencia, presidente di direktiva Karel Visser i miembro di direktiva Riet Sealy ta papia ku mayornan prekupá – potrèt: Janita Monna
KRALENDIJK – Kasi e no por tene su lágrimanan bou di kòntròl, ora na kabamentu di e anochi e konta su relato. “Mi motivashon a kita. M’a studia tres aña pòrnada?” Studiante di mbo Gilda Melaan na radio a tende djabièrnè e notisia ku e mbo di Scholengemeenschap Bonaire por lo pronto no por tene èksamen òf entregá diploma.
E medida ta sigui un karta di Inspekshon di Enseñansa. Esei no tin sufisiente konfiansa den e komishon di èksamen, ku mester supervisá un bon transkurso di e eksaminashon.
E notisia ta yama hopi pregunta i insiguridat serka mayornan i studiantenan. P’esei Scholengemeenschap Bonaire (SGB) a tene un anochi di informashon djabièrnè anochi pa kontestá e preguntanan.
“Mi ta masha rabiá!”, un mama ta bisa. “E problema aki tei masha tempu kaba. Boso no a hasi boso trabou. Mi yu muhé i nos yunan aworó no por sigui studia. Nan tin problema enorme ku motivashon. Bo mester a mira nan bini kas na yoramentu. Anto kiko awor?”
Komprenshon
Direktor general di SGB, Lydia Emerencia ta komprondé e reakshon di e mayornan i ta konfirmá ku inspekshon anteriormente kaba, den un investigashon di mart 2015, a ekspresá krítika riba e manera ku e komishon di èksamen ta funshoná. Segun e, e ora ei a tuma medida inmediatamente. Por ehèmpel a remplasá e direktor di unit e tempu ei pa un interino, siguí kabamentu di e aña aki pa e direktor di unit aktual Melvin Statia. E direktor di unit i e lidernan di tim di mbo ta forma e Komishon di Èksamen.
Un tata no ta komprondé. :For di na mart sa kaba ku tin problema. Pakiko ta awor numa nos ta tende? Ta nos yunan ta e víktimanan.” Tòg tin hende den sala ku ta puntra nan mes ‘ki derechi e inspektor tin pa hasi esaki ku nos yunan’.
Plan di trabou
E skol aktualmente ta trahando un plan di trabou, Emerencia ta konta. Lo presentá e plan ei e fin di siman aki na direktiva di SGB i si tur kos bai bon djaluna e plan ta yega ofisina di Inspekshon di Enseñansa. “Nos ta sali for di e punto di bista ku lo bira un plan di trabou ekselente.”Direktor di mbo Statia ta spera ku djei e problema lo solushoná lihé.
No solamente ta para e èksamennan mesora, tantu di teoria komo di práktika, tambe mbo tin algun kurso ku no ta sertifiká. “Mester buska e diplomanan ei bèk”, Emerensia ta bisa. E direktor general no por bisa di kuantu studiante ta trata eksaktamente. E ta enfatisá si ku e skol ta pidi diskulpa pa e manera ku kosnan ta bai. Tambe SGB lo kubri e gastunan di un eventual temporada di estudio èkstra.
Retraso
Un studiante di mbo den su di dos aña tabata sorpresá ora el a tende e notisia djabièrnè. “Bon mirá mi ker a hasi mi estudio di Business Administration den tres aña. Esaki lo no por mas. Mi ta haña retraso.”E ta bai skol djaluna normalmente, lèsnan ta sigui, e tèstnan regular tambe. “Ma mi ta tende tambe di hóben ku ke stòp”, e ta bisa.
Riba e pregunta kon e skol lo pone e motivashon di e studiantenan bèk na nivel djabièrnè no ta bini un kontesta konkreto. Emerencia: E impakto ta desastroso. Esaki no ta hustu kontra e studiantenan.”
Pero, e ta añadí: “Ku e eksaminashonnan ta stòp awor, no ke men ku nunka mas lo no eksaminá. Lo papia ku kada studiante e siman ku ta bin tokante e konsekuenshanan di e medida pa e kontinuashon di nan estudio”
Outor Janita Monna