DEN HAAG – Destino di e studiantenan di mbo di Scholengemeenschap Bonaire (SGB) ta den man di e plan di mehorashon pa e skol. Si Inspekshon di Enseñansa aprob’é por tene èksamen atrobe. Esaki minister Jet Bussemaker (Enseñansa, Kultura i Siensia) a deklará awe na e ora di pregunta den Tweede Kamer.
No ta sigur te ki dia no por tene èksamen. Bussemaker: “Si e skol logra pa drecha esaki lihé – e siman aki mes ta posibel – e ora ei banda di mart of aprel por tene èksamen atrobe. Pero e ora ei direktiva i maneho mester tuma nan responsabilidat pa masha lihé bini ku un bon plan.”
E mandatario ke pa e skol duna oportunidat tambe na studiantenan di mbo ku a kaba di studia anteriormente, i ku despues di esaki a deskubri ku tabatin problema ku nan diplomanan, pa alkansá nan retrasonan.
Forma
E studiantenan di mbo di Forma, un instituto pa edukashon di adulto, kontrali na notisianan anterior no tin nodi di tin miedu pa nan èksamen final òf balor di nan diploma. Forma ta sostené SGB den formulashon di e plan di mehorashon.
Plannan anterior di mehorashon no a yuda. “Nò, pero aña pasá a tuma hopi akshon si”, e minister ta bisa. “Aña pasá nos a prepará un instrukshon, despues a sigui akshon i a bini un direktiva kompletamente nobo, mi ti konfiansa den esaki. I pronto lo bini un direktor nobo tambe.
Djabièrnè a sali ku studiantenan di mbo na SGB no por hasi èksamen pasobra e eksaminashon no ta sufisiente. Miembro di Tweede Kamer Roelof van Laar (PvdA) a hasi pregunta tokante di esaki na Bussemaker.
Outor Pieter Hofmann