Studiantenan di mbo djaluna a protestá dilanti skol –potrèt: Janita Monna
KRALENDIJK – Djaluna meinta mitar di ocho. Normalmente ta e ora ei lèsnan ta kuminsá, pero awe nò. Pasobra studiantenan di mbo di Scholengemeenschap Bonaire a sera e edifisio. Un grupo grandi di mucha hòmber i mucha muhé, bisti na blanku ku un sinta di rou pretu ta blòkiá e entrada. Tin yen di bòrchi di protesta kologá na e skol.: ‘Create your future? More like destroy it’.
Djabièrnè pasá e studiantenan a tende ku por lo pronto mbo no tin mag di tene èksamen pasobra e inspekshon di enseñansa no tin konfiansa den e Komishon di Èksamen. Suleima Thodé, studiante di medionan di komunikashon, ta un di e boseronan di e grupo. Djabièrnè 8 di yanüari e mester a haña e evaluashon final di su edukashon. Mei ora delantá m’a tende ku esaki lo no sigui.”
Potrèt: Janita Monna
Rabiá
Thodé ta masha rabiá. Su edukashon, ku a kuminsá na 2012 parse no ta akreditá. “Hopi kos a bai malu den kurso di añanan. Awor nos ta kla ku dunamentu di chèns.” Un hóben ku un kabei di span hanchu ta hisa un bòrchi. “E situashon na mbo ta meskos ku mi kabei’.
Dosentenan di mbo ta sostené e alumnonan. Ta bon ku nan ta sali na nan mes defensa. Mi ta spera ku pronto lo tin klaridat”, un di nan ta bisa. Miembronan di Eilandsraad di tur tres partido tambe ta presente. James Kroon (UPB) djabièrnè numa a tende di e problemanan na mbo. “Mi ta pará tras di e studiantenan.”
Rònt di och’or direktor general Lydia Emerencia ta yega. E ta proponé pa bai papia ku un delegashon di studiante. E hóbennan no ke. E problema aki ta trata a tur hende. Ke men tur hende mester tende kiko ta papia.””
Pretu riba blanku
Studiante kuido i bienestar Gilda Melaan – e ta spera di kaba di studia e aña aki – ta añadí: Nos a disidí di tene e protesta aki despues di e enkuentro di djabièrnè pasá. E dia ei direktiva i maneho a primintí ku nan lo traha un plan di trabou, ku awe lo tabata serka inspektor. Nos ke pretu riba blanku ku esaki a sosodé tambe.” No muchu despues e studiantenan ta bini huntu den oula di e skol pa ei haña kontesta riba nan preguntanan serka direktor general.
Thodé ta haña hopi aplouso ora e tuma palabra. “Kon por ta ku e skol for di 18 di desèmber a tende di inspekshon ku no por a tene èksámen mas, miéntras ku ta pone nos na altura te riba 8 di yanüari? Kon komishon di èksámen ta bai solushoná e problema? Kon e skol ta garantisá ku nos por hasi èksamen tòg? Kon nos ta haña konfiansa bèk?
E reakshon lat, asina Emerencia ta bisa, entre otro por splika pasobra e karta di inspekshon a yega riba último dia di skol promé ku fakansi di Pasku. “Ta un karta ku hopi impakto, lo tabata agradabel si a anunsi’é delantá.”
Komishon di Èksámen wikènt pasá a lanta un ‘plan di trabou’ ku direktiva di skol a aprobá i a manda pa inspekshon. “Entretantu tin kontakto ku inspekshon.” Ku den pasado a kuminsá estudionan ku (ainda) no tabatin akreditashon ’no mester a sosodé’, Emerensiana ta di akuerdo. E ta spera un pronto solushon di e problema.
Oportuno
Un di e bòrchinan di protesta ta pone speransa riba e diputado. Kuerpo públiko tin masha poko di bisa tokante eksaminashon”, segun diputado di enseñansa Benito Dirksz, ku tambe ta presente den oula. “pero ku inspekshon por kousa asina un konsternashon na Boneiru, mi no ta haña oportuno.”
Outor Janita Monna