Minister di Finansa Jose Jardim ta bisa ku mester duna supsidio mas efisientemente – potrèt: Ministerio di Finansa
WILLEMSTAD – Otorgamentu di supsidio na fundashon ta basá riba kapricho i intromishon polítiko i gastu general ta subi enormemente. Esaki ta pará den un rapòrt ku for di 30 di sèptèmber 2014 ta den kashi.
Un promedio di mas ku mitar di tur supsidio – 55 porshento – ta gasta na gastunan di personal di fundashonnan, ta sali for di e rapòrt. Gobièrnu no sa bon ta kua servisionan ta kumpra i tin un koinsidensia parsial grandi di fundashonnan ku ta suministrá e mesun servisionan. Ámtenarnan di kontakto ku ta amigu ademas ta prolongá supsidionan outomátikamente sin ku e fundashonnan a duna kuenta i rason.
Desenionan
Ta konklushonnan pisá den e rapòrt ku a traha bou di òrdu di Konseho di Minister (RvM) den kuadro di e trayekto di ekonomisashon. “Tabatin bon motibu pa hasi e estudio aki, tabatin suposishon ku tabatin hopi kos di drecha. Esaki no ta algu di último añanan, sino di desenionan. E rapòrt a konfirmá e suposishonnan”, minister di Finansa José Jardim ta laga sa.
Riba 26 di novèmber 2014 RvM a deliberá tokante e rapòrt pa promé be i riba 18 di febrüari i 11 i 25 di mart aña pasá trato di e rapòrt tabata riba agènda. Un dokumento di desishon ku a traha pa motibu di e rapòrt na aprel di aña pasá, nunka mas no a introdusí den un reunion. Ademasa minister di Desaroyo Sosial Ruthmilla Larmonie Cecilia, ku mayoria di e fundashonnan ta kai bou di dje, ta bisa ku e no konosé e rapòrt. “Den e temporada ei mi a kaba di haña mi nombramentu komo minister”e ta splika.
Efisiente
E trato di e dokumento awor ta planeá pa fin di yanüari, kasi nuebe luna mas lat. Pakiko a tarda asina largu Jardim no por bisa. E ta konfirmá si ku algu mester kambia lihé. “Ta bèrdat ku tin hopi plaka ta bai e fundashonnan. Si bo wak finansa di gobièrnu no tin falta di plaka, ta mas e pregunta kon efisiente ta usa e plaka. Nos mester pone prioridat i no buska fondo èkstra ora bini un maneho nobo, pero wak ta unda tabatin gastamentu.”
For di e investigashon a bin sali ku algun fundashon tin poko konosementu. “No ta tur fundashon ta disponé di e bon òf sufisiente konosementu i abilidat. Hopi bia miembro di direktiva ta pashoná riba e tereno kaminda nan ta ofresé produkto òf servisio, pero esei no ke men ku nan tin tinu tambe di finansa, direktiva i maneho”, tin pará den e rapòrt.
Influensha i preshon
Un di e dies opstákulonan interno di den e rapòrt ta e relashon polítiko ora di otorgashon. “E minister ta responsabel pa e firmamentu di e dekreto ministerial ku kua ta otorgá e supsidio. E echo ku e minister ta firma ta habri porta na skref pa ehersé influensha i preshon.”
Prolongashon outomátiko di e supsidio hopi bia ta pa motibu di e proseso kompliká pa terminá un relashon i e laso estrecho ku ta krese entre e instansia i e ámtenar di kontakto, ta konkluí den e rapòrt. “Esaki ke men tambe ku no ta tur ora ta ehekutá un evaluashon krítiko usando eksigenshanan kalitativo i kuantitativo di e produkto òf di e alkanse di e resultadonan deseá òf nò.”
Kuadro
Jardim ta enfatisá ku ta traha na e kuadronan di maneho kaba, pa asina bira kla ta kiko gobièrnu ta kumpra serka e diferente fundashonnan e na kiko ta saka plaka. Tambe mester bini normashon pa gastu general.
Outor Anneke Polak