Grayen Damascus eks alumno di Techno Future School – potrèt: Deya Mensche
WILLEMSTAD – Resientemente SEDA a selebrá su 35 aña di eksistensia, i esei ta motibu pa para ketu na su impakto riba formashon di hende muhé i su famia. Según Meyrtha Leetz – Cijntje, presidente di SEDA fo’i 2007, e fundashon su derecho di eksistensia ta mas valido ku nunka. Pero e perla di SEDA su logro ta Techo Future School ku a kuminsá na 2013, kual ta un kurso pa ‘dropouts’ di skol sekundario, entre 16 pa 24 aña.
SEDA a keda funda na 1980 komo un sentro ku mester trata tur loke ta nesesidat, guia i formashon di hende muhé. Primeramente SEDA ta duna asistensia sosial, pero tambe tin e proyekto ‘Un Man Ta Laba Otro’, unda por duna material segunda mano, kual ta keda partí bou esun ku tin mester. Tambe e fundashon ta manehá e lokalidatnan Rosa di SEDA i Siglo 21.
Na 2009, SEDA a lansa un kurso pa hende hòmber yama KRA (Konekshon Real ku Alma), komo partí di su kursonan pa formashon, kual Pader Paulina [teólogo], Nelson Campbell [psikólogo] i Meyrtha Leetz-Cijntje [orto pedagogo] mes a desaroyá i alabes ta fungi komo instruktor. Tambe SEDA ta duna varios kurso pa hóben i mama soltero, titula ‘Ken Mi Ta’ i ‘Flor di Hubentut’, un tayer ku ta kuminsá na yanüari 2016, i unda a prepara binti hende ta fungi komo guia di sírkulonan restaurativo.
Techo Future School
Techno Future ta fungi komo un konekshon pa e hóben rehabilita bèk den skolnan avansá. “Hopi hóben ku ta ‘dropout’ no tin un kaminda pa bai i sea ‘Reclassering’, e skol of otro instansia ta yama pa inskribí e hóben”, Leetz – Cijntje a splika. Despues e mayor ta bini pa inskribí i e hóben ta bin hasi un entrevista rigoroso pa determina ki direkshon edukashon e hóben mester bai. 10 pa 18 mucha pa aña ta kuminsá e trayekto preparatorio di tres luna i mei, unda nan ta haña entrenamentu formativo, hopi biaha den un sírkulo restruktivo.
Despues ta sigui kuater luna unda un grupo mas chikitu ta traha na e tayer. Aki ta enfoká riba praktiká unda nan ta siña domina e sinku disiplina di karpinteria, palu, awa, material plástiko i metal. “Si bo manda nan un skol téchniko sin e guia sosial i sikológiko, nan lo frakasá na kaminda”, Leetz- Cijntje a splika. Si e hóben no kièr bira ‘handyman’, SEDA ta kana tur posibel kaminda pa yuda e hóben yega nan un alternativa edukashonal avansá.
Mayornan tambe ta haña entrenamentu pa kon nan tin di guia nan yu. “Tur delaster djasabra di luna nos ta bini huntu pa entrenamentu pa siña tur etapa di desaroyo di nan yu”, Leetz – Cijntje a splika. Según Leetz – Cijntje, na Feffik so kaba tin entre 8 pa 21 alumno ku a matrikulá na e instituto.
Asina Ret Karibense a kòmbersá ku èks alumno di Techno Future School, Grayen Damascus di 18 aña di edat, aktualmente studiante na Feffik komo lasdó prinsipal. Damascus a bini den kontakto ku Techno Future via di DOS, pasobra e no tabatin e mihó komportashon na skol. E hóben ta atmití ku anteriormente e no tabatin muchu smak di siña i ta preferá pa traha ku su man. Según Damascus, tin mas aserkamentu na e dosentenan na Techno Future, i nan ta yuda bo i splika bo riba e manera di mas fásil pa bo komprondé. “Nan tin pasenshi i e interes tei pa siña bo kon pa kapta e materia”, ela konkluí.
Kaminda korekto
Damascus ta splika ku ora ela yega na Techno Future School ela haña un klaridat. “Si bo ke, Techno Future por pone bo riba e kaminda korekto. Ora mi kaba Feffik mi ke bai studia na Merka komo lasdó di bou awa”, ela konkluí.
Outor Deya Mensche