Quensley Raphael (man robes) i direktor Sebastian Kes na e estreno | Potrèt: Dick Drayer
WILLEMSTAD – Derecho igual i aseptashon sosial ta para sentral den e dokumentario One Kingdom, One Love di direktor Sebastian Kes. Bou di enkargo di e organisashon tras di e barku di gaypride na Amsterdam el a potretá algun homo, lesbo i transgender na Aruba, Kòrsou i Sint Maarten. E siman aki a pasa e sine pa promé bia na Willemstad.
Quensley ‘Q’ Raphael ta biba na Kòrsou i e ta homo for di tempu ku e por a pensa. “Tur hende tabata mira ku mi ta diferente. Bo ta mira ku mi ta afeminá, un tiki femenino.” Tòg su coming out no tabata fásil. Su mama a rabia i su tata a haña un black-out. “Pero despues e aseptashon a bini i nan no a kore ku mi manera serka hopi di mi kompañeronan aki na Kòrsou.
Mario Kleinmoedig, aktivista homo di hopi tempu, ta bisa ku kada isla tin su propio eksperensia ku homoseksualidat. “Nos kultura ta diferente for di Hulanda. Nos ta hopi mas indiskutibel den nos rechaso. Serka nos religion tambe ta hunga un papel grandi. Na Hulanda nò. Derecho humano tampoko no ta hunga un ròl den e eksperensia i aktitut di kurasoleñonan.
Bèrgwensa
Glenda Ottenheim tin un yu muhé lesbiana. E ta bisa ku na Kòrsou homoseksualidat tin un dimenshon èkstra ora un yu muhé òf hòmber divulgá nan preferensia seksual komo homoseksual. “Aki mayornan mester dil ku rechaso i bèrgwensa. Bo ta preferá di no papia di nada. Ami ta nenga esaki. Mi no tin bèrgwensa di nada.”Ottenheim sa kuantu abusu tin, kuantu miedu tin. “Tin yu ta kana rònt ku karta di despedida den nan telefon, pa nan mata kurpa. Komo mama bo no por ignorá esaki asina numa, tòg?”
Alex Rosaria, lider di e partido PAIS ta un di e miembronan di e pènel despues ku e sine kaba. Huntu Ku Kes, Kleinmoedig i Stephen Walroud di PAR e ta diskutí ku sala tokante di e sine i homoseksualidat na Kòrsou. Segun Rosaria e kaminda di bai ta largu ainda, pero aworakí a bira tempu si pa bini ku legislashon kontra diskriminashon. E ta pensa ku por haña sosten polítiko p’esaki. Ounke e ta atmití ku den e koalishon aktual ainda no por fòrsa masha kos.
Diabel
E kosnan aki por pone Ottenheim rabia mashá. “Pensamentu medieval. Den e sine Wini Raveneau (parlamentario pa Pueblo Soberano, red.), ta kompará hende homoseksual ku diabel. E ora ei mi tin derecho di bisa ku mi ta konsider’é un hasidó di brua.”
E sine lo pasa rònt Kòrsou e lunanan binidero i lo pas’é na skolnan.
Outor Dick Drayer