Rei di tumba 2016 (mei mei) - potrèt: Deya Mensche

Rubertico ‘Benoni’ Balentien Rei di tumba 2016 – potrèt: Festival di Tumba Facebook Page

WILLEMSTAD – Den mardugá grandi a premia Rubertico ‘Benoni’ Balentien komo e ganado absoluto di Festival di Tumba 2016, ku e tumba “Nos Dos Ta Bati Bai’. E Rei di Tumba keda kompañá pa ERA i alabes a gana mihó areglo pa su kompositor Gregory Colina.

Promé finalista i ganado di premio Betty Doran ta Gilbert ‘Dibo’ Doran, ku “Ranka fo’i Sta. Maria” i e di dos finalista ta Danny Yanga, kende a trese un ‘Ambiente Kayente’ den Festival Center.

Ora ta papia di tumba, no por keda sin menshoná nòmber di e legendario rei di tumba i kompositor, Ikej Jesurun. Hopi biaha e famoso kompositor sa di antemano ora e skirbí un tumba ganado. ‘Sigur, Sigur! Mi ta e úniko tumbero na Kòrsou ku tin 5 bia promé finalista, 6 biaha di dos finalista, 4 di tres finalista 3 biaha di kuater finalista”, ela splika. Den 25 aña, Ikej a klasifiká 22 biaha den e top 10 i ela mustra nos su impreshonante kamber di trofeo unda tur e korona, plakat i trofeo ta warda. E aña akí so Ikej a kompositá 15 tumba pero ta e tumba di Ishahier Monti titula ‘Laboratorio Karnaval” a kai den premio komo prome finalista pa miho areglo.

Ikej Jesurun, kompositor di tumba - potrèt:  Deya Mensche

Ikej Jesurun, kompositor di tumba – potrèt: Deya Mensche

Proseso di komposishon
Según Jersey Isenia, konosido kantante di Doble RR i finalista di varios festival di tumba, e proseso di komposishon ta unu ku ta dura henter aña. “Inspirashon ta bin di mes i mi ta kuminsá traha trempan riba mi tumbanan”, Jersey a splika. Ikej i Jersey ta di akuerdo ku komposishon di un bon tumba ta un arte. “Bo no por bai un skol pe, paso ta un don e ta”, Ikej a splika.

Durante festival di tumba di e aña akí, Jersey kende tin años ta biba na Aruba, a kompositá kuater kantika. “Mi a aserka Cesar Olarte i a invite pa partisipá na Festival di Tumba na Kòrsou”, Jersey a splika. Ya pa dos aña kaba, varios kantante rubiano a partisipá den Festival di Tumba i e aña akí tabatin tres partisipante. Tabata un shòk pa tur ora e talentoso kantante rubiano no a kalifiká pa final. Según areglista Clark Elizabeth, esaki ta debí ku e públiko ta unu difísil, i no a mustra hopi ánimo durante e presentashonnan. “Ami no ta komprondé kiko a pasa Cesar, paso su tumba tabata bon, pero e aña akí tur tumba ta riba mes un level, pues e resultado final ta bai bira unu difísil”, ela kompartí.

Según Ikej i Jersey Festival di Tumba a progresa inmensamente. “Ela bai 800 porshento dilanti”, Ikej a deklará. “Pero tòg mi ta sinti falta di e temporada di Roxy i Stadion di Sub, unda kada fanátiko tabata bin ku su Tishùrt i anima su favorito. Awendia ta trahe i kabei ta konta. Awó porta e públiko ta baila 10 tumba i sobra nan ta sinta”, ela lamenta.

Kompostor i areglista Jersey Isenia & Clarck Elizabeth den akshon - potrèt: Deya Mensche

Kompostor i areglista Jersey Isenia & Clarck Elizabeth den akshon – potrèt: Deya Mensche

Negoshi di Tumba
Indudablemente, Festival di Tumbá ta gran negoshi. Según finalista Germain ‘Saminero’ Christina, bo mester mínimal 2 mil florin pa partisipá den Festival di Tumba. “Den mi kaso, ta famia i amigunan a yuda”, ela splika. “Mester paga e banda 1000 doler pa e sekshon di bras, i despues mester diseña un trahe tambe. Awendia e sponsor no ta sostené paso ainda e hóben no tin nòmber”, Ikej a splika.

Pa varios aña kaba AMAK a introdusí un sistema di kompensashon, ku por varia depende kon e entradanan di e festival ta e aña ei. Inskripshon semper ta gratis, i AMAK ta pagá tur banda un kompensashon di partisipashon di aproksimadamente 2 mil florin. Adishonalmente, 4500 florin ta keda paga na kada banda i kompositor ku kalifiká, i e top 10 ta bolbe haña 3500 florin. E premio di e rei/reina di tumba ta depende di pay-per-view i otro entrada, pero esaki por varia entre 10 pa 15 mil florin.

Outor Deya Mensche