Segun CTB turistanan ke ta prepará, pero Zika no ta un motibu pa keda sin bini Kòrsou – potrèt: Elisa Koek
WILLEMSTAD – “Dies aña kaba nos ta bini Kòrsou tur lènte, pero e aña aki nò”, Tineke Verweerd ta konta. Mi yu muhé ta na estado i e vírùs di Zika ei ta peligroso. Mi mes tambe ta preferá di salta un bia.”
Verweerd no ta e úniko hende ku ta legumai su vakashon tropikal e aña aki, pero tòg ta manera e vírùs di Zika no ta un menasa direkto pa turismo na Kòrsou. “Bon mirá nos no ta ripará nada i pa ta franko, aña pasá ora tabatin Chikungunya tampoko, Caroline Härtel, Manager External Affairs na TUI ta bisa.
Kompania aereo InselAir ta bula pa Sürnam tambe, kaminda e kantidat di kaso di Zika ta subi rapidisimo, i pa Brazil, e pais kaminda Zika a yega for di Afrika i Asia. Tòg nan no ta ripará ku e reservashonnan ta baha.
No ta duna plaka bèk
Entretantu ta konsehá pasahero hulandes na estado pa no biaha pa Brazil i Sürnam pero pa Kòrsou ainda no a sali un aviso ofisial. P’esei Charlotte Bijenveld-Sneyers ku ta na estado no a haña plaka bèk di KLM ora el a indiká ku e no ke hasi su biahe pa Kòrsou mas. “Nos ker a pasa e teketnan pa un otro nòmber pero te aworakí esaki no ta pèrmití”, Bijenveld-Sneyers ta bisa.
KLM ta bisa ku nan ta reakshoná solamente riba un konseho di biaha negativo. Esaki ta gobièrnunan lokal por duna. Na Tui tampoko no tin areglo spesial pa motibu di Zika. Sí por kambia un hende pa un otro destinashon. “Anulá semper ta difísil, pasobra nos ta ofresé biahe di pakete tambe. No ta trata solamente di e biahe, Härtel ta splika.
Informashon
Curaçao Tourist Board (CTB) tin bon kontakto ku Caribbean Tourist Organization tokante Zika. Henter Área Karibense tin algun tempu kaba okupá ku e vírùs, segun manager di komunikashon Sonia Kleinmoedig. Na Kòrsou nos tin un kaso registrá i no ta un kontagio lokal.
CTB entretantu a distribuí informashon na tur interesado den ramo di turismo i ta traha huntu ku GGD na flyer i poster na diferente idioma pa turista. Nan ta parti esakinan den avion, na hotel i na nan propio ofisinanan. Tambe nan a informá nan koleganan na Hulanda i na Estádos Unídos i prepará nan riba pregunta.
Turistanan ta keda bini
Segun Kleinmoedig e turistanan ke ta prepará espesialmente, pero Zika no ta un motibu pa no bai Kòrsou. Ta meskos ku Chikungunya ku a toka míles di hende aña pasá na Kòrsou. “Turismo no a bai atras e tempu ei ke men nos ta ferwagt ku e bia aki tampoko. Nos ta sigui monitòr Zika pa nos por kontestá tur pregunta, pero aworakí e vírùs sigur no ta un menasa pa turismo.
Outor Elisa Koek