E pènel durante di e oudiensia. Di robes pa drechi Farly Lodowica i Jerry Gumbs (èks habitante di bario), Sven Rusticus (fundashon Green Town), Arjen Linthorst (fundashon SMOC), i katedrátiko derecho di maneho Herman Bröring (Rijksuniversiteit Groningen)
DEN HAAG – Herman Bröring, katedrátiko di derecho di maneho na Rijksuniversiteit Groningen, ta haña ku ta trata di violashon kontra derecho humano si ta trata di Refineria Isla na Kòrsou. Ku esaki segun e ta Reino ta na turno, i no gobièrnu di Kòrsou.
Bröring: “Reino ta e partido di tratado i ta trata di un infrakshon di tratado. Esaki no sa sosodé fásil pero sí ora e infrakshon dura largu, ta severo i ta bira mas i mas pió.”
Den Tweede Kamer awe a tene un oudiensia tokante refineria Isla na Kòrsou. Ei un pènel a mustra nan preokupashon ku e sushamentu i e konsekuenshanan pa salubridat públiko.
Interes finansiero-ekonómiko
Ta mira refineria Isla komo un pilá importante bou di ekonomia di Kòrsou. Arjen Linthorst (fundashon Medio Ambiente Limpi Na Kòrsou) ta krak e interes finansiero-ekonómiko di Isla. Segun un balorashon kouteloso di Ecorys, pa motibu di sushamentu gobièrnu di Kòrsou ta saka hopi mas plaka na kuido di salubridat ku nan ta gana ku produkshon.
Isla no ta trese hopi oportunidat pa trabou tampoko, Linthorst ta bisa. “Sinkuenta aña pasá nan tabatin 12.000 hende na personal riba un poblashon mas chikitu ku awe.. Awor tin mil hende ta traha riba un poblashon di 156 mil, anto ta 300 so ta trahadó lokal.”
Tòg tin preokupashon tokante esaki: kiko si sentenar di hende ta pará riba kaya di repente? Segun èks-habitante Jerry Gumbs, lo ta asta un ‘desaster’ si Isla sera abruptamente. “Pero no por sigui asina.”
Fardy Lodowica, un otro èks-habitante, ta splika kon hundu e refineria ta ankrá den komunidat. “Bo no tabata sa mihó, i ainda hopi hende no sa. I komo ku tabatin hopi interes envolví, hopi bia bo tabata aseptá numa.”
Debate
Mañan Tweede Kamer ta tene un debate tokante esaki ku minister Ronald Plasterk (Asuntunan Interior i Relashonnan den Reino). Plasterk repetidamente a pèrsistí ku e kaso ta un asuntu interno di Kòrsou. Pero Tweede Kamer a manda e mandatario okupá su mes aktivamente ku e problemátika.
Parlamentario Liesbeth van Tongeren (GroenLinks) ta di akuerdo. “Nos no por laga e situashon aktual manera e ta. Mi ta haña ku minister Plasterk mester tuma akshon den Reino.” Gobièrnu di Kòrsou tabata invitá pero nan tabata ousente.
Outor Pieter Hofmann